Саха сиригэр дьаҥ кэнниттэн экэниэмикэни чөлүгэр түһэриигэ этиилэри хомуйуохтара
Саха сирин хас биирдии олохтооҕо коронавирус улахан дьаҥын кэнниттэн, өрөспүүбүлүкэ экэниэмикэтин чөлүгэр түһэриигэ этиилэрин киллэриэхтэрэ.
edersaas.ru
Бу иннинэ Айсен Николаев Ленскэй кулууп “Уһук Илин: COVID-19 кэннинээҕи олох” мунньаҕар тыл этэригэр, хоруона хамсыгын кэнниттэн эрэгийиэн экэниэмикэтин чөлүгэр түһэриигэ былаас уонна уопсастыба түмсүөхтээхтэрин ыйбыта.
“Өрөспүүбүлүкэ экэниэмикэтигэр, кириисис туругуттан тахсыыга Саха сирин олохтоохторо сомоҕолостохторуна, хас биирдии киһи санаатын иһиттэхпитинэ кыаллыаҕа. Олох-дьаһах ханнык эрэ салаатыгар чопчу кэскиллээх этиилэри киллэрэр элбэх киһини хабыахтаахпыт”, — диэн One Click Yakutia бырайыак салайааччыта Иван Степанов бэлиэтээтэ.
Кини этиилэри хомуйуу Саха Өрөспүүбүлүкэтин бырабыыталыстыбатын, Саха Өрөспүүбүлүкэтин Ил Дарханын иһинэн Стратегическай чинчийиилэр кииннэрин өйөбүллэринэн yakutia.click саҥардыллыбыт порталыгар ыытыллыаҕа диэн эбэн эттэ.
One Сlick Yakutia – бу гражданнар, былаас уонна биисинэс сытыы боппуруостары быһаарыыга ыкса сибээстээхтик үлэлииллэригэр туһуламмыт цифровой бырайыак. Бу платформа көмөтүнэн Саха сирин олохтоохторо муниципальнай тэриллиилэр, судаарыстыбаннай былаас ситэриилээх уонна сокуону оҥорор уорганнарын, эппиэттээх сулууспалары уонна кэтээн көрөр уорганнар бэрэстэбиитэллэрин кытта быһаччы сибээстэһэн, үөскээбит кыһалҕалар тустарынан иһитиннэриэхтэрэ уонна олорор нэһилиэнньэлээх пууннарыгар олоҕу-дьаһаҕы хайдах тупсарар туһунан санааларын этиэхтэрин сөп.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА
Хаартыска: сайтан