Доруобуйа Маны аах

Саха сиригэр COVID-19 ыалдьыы сыыйа намырыыр

Ааспыт нэдиэлэ түмүгүнэн, Саха сиригэр коронавируһунан ыалдьааччы ахсаана арыый аҕыйаабыта бэлиэтэнэр.
Бу туһунан Ил Дархан суһал ыстаап улуус баһылыктарын кытары мунньаҕар иһитиннэрдэ. Ол да буоллар, коронавируһу уонна кирииби утары быһыылары биэрии тэтимин намыраппаттарыгар эттэ.
«Ааспыт нэдиэлэ түмүгүнэн өрөспүүбүлүкэҕэ, Дьокуускай куоракка эмиэ, коронавируһунан ыалдьааччы ахсаана аҕыйаан эрэрэ бэлиэтэнэр. Өрөспүүбүлүкэҕэ ыалдьыы уопсай көрдөрүүтүттэн, Дьокуускайга 40-45%.  Оттон соторутааҕыта эрэ 50 уонна онтон үөһээ бырыһыан этэ. Ол да буоллар, сорох оройуоннарга, ол курдук Нерюнгригэ, Хаҥаласка, Томпоҕо  быһыы-майгы билигин да уустук, — диэтэ Ил Дархан Айсен Николаев.
«Быһыыны биэриигэ уон оройуон намыһах көрдөрүүлээх. Олорго нэһилиэнньэ 60-тан кыра бырыһыана вакцинацияламмыта бэлиэтэнэр. Бу Амма, Үөһээ Бүлүү, Горнай, Кэбээйи, Мииринэй, Нам, Нерюнгри, Өлүөхүмэ, Уус Алдан уонна Чурапчы«, — диир кини. Ааспыт нэдиэлэҕэ коронавируһу утары быһыыны ылыыга нэһилиэнньэҕэ (улахан дьоҥҥо)  70 % толорбут Дьокуускай куораты бэлиэтээтэ. «Дьокуускайга дьаҥнааһын ахсаана намырааһынын биир биричиинэтэ бу«, — диэтэ Ил Дархан.
Вице-премьер Ольга Балабкина этэринэн, бу кэм устатыгар барыта 70 218 киһи коронавируһунан ыалдьыбыта бэлиэтэммит. Оттон кэнники хонукка 149 киһи үтүөрбүт.
Роспотребнадзор дааннайынан, чугастааҕы кэмҥэ COVID-19 көбүүтүн билэргэ, лаборатория чинчийиитин кэҥэтии былааннанар. Роспотребнадзор бэрэстэбиитэлэ үөрэх тэрилтэлэригэр кириибинэн уонна ОРВИ-нан ыалдьыыга болҕомтолоохтук сыһыаннаһалларыгар, кирииптэн нэһилиэнньэ, ордук оҕолор, быһыыны ылалларыгар  этэр.
0
0