Бүгүн балаҕан ыйын 11 күнүгэр Арассыыйа үрдүнэн биир кэлим куоластааһын ыытыллар. Саха сиригэр 484 муниципальнай быыбар буолар. Ол иһигэр тоҕус улууска баһылыктары талыахтара.
Тоҕус улуус — Абый, Үөһээ Бүлүү, Дьааҥы, Бүлүү, Ленскэй, Мэҥэ Хаҥалас, Ньурба, Орто Халыма уонна Томпо — баһылыктара быыбарданыахтара. Булуҥҥа, Дьааҥыга, Кэбээйигэ, Өймөкөөҥҥө, Томпоҕо, Усуйаанаҕа, оройуон сэбиэтин дьокутааттара талыллыахтара. Ону таһынан өссө биэс улуус сэбиэтигэр эбии быыбардар буолуохтара. Нэһилиэктэр таһымнарыгар барыта 464 быыбардыыр хампаанньа ыытыллыаҕа. Өрөспүүбүлүкэ 189 нэһилиэгэр баһылыктар быыбарданыахтара, 275 нэһилиэккэ дьокутааттар талыллыахтара.
Быыбар киин хамыыһыйатын иһитиннэриитинэн, быыбар хамыыһыйаларыгар киирбит 5435 сайабылыанньаттан барыта 5332 кандидат регистрацияны ааһан быыбарга кытта сылдьар. Ол иһигэр 3298 киһи баартыйалартан, 2034 кандидат бэйэ туруорунуутунан. Баартыйаларынан ылан көрдөххө, быыбардарга “Биир ньыгыл Арассыыйа”, “Сиэрдээх Арассыыйа-кырдьык туһугар”, “КПРФ”, “ЛДПР”, “Биэнсийэлээхтэр баартыйалара”, “Гражданскай платформа”, “Родина”, “Социальнай харыстабыл баартыйата”, “Дьыала баартыйата” бэйэлэрин кандидаттарын туруорбуттар.
Саха сиригэр, үгэс курдук, Абый, Аллайыаха, Үөһээ Халыма, Муома, Аллараа Халыма, Орто Халыма улуустарыгар Дьокуускай бириэмэтинэн сарсыарда алта чааска саҕаламмыта. Билиҥҥи туругунан, өрөспүүбүлүкэ үрдүнэн барыта 539 быыбардыыр учаастак арыллан үлэлэрин саҕалаатылар.
Аграфена КУЗЬМИНА