Бэлиитикэ Сүрүн

Саха сиригэр быыбар түмүктэннэ

Киэһэ алта чаастааҕы көрдөрүүнэн, Саха сиригэр быыбардааччылар  47,33 % куоластаабыта. Билигин  быыбардыыр учаастактар сабыллан, куоластары ааҕыы саҕаланна.

Быыбар киин хамыыһыйатын бэрэссэдээтэлэ Евгений Федоров иһитиннэрбитинэн, Саха сиригэр быыбардар түмүктэннилэр. Санатан эттэххэ, биһиэхэ Судаарыстыбаннай Дуума быыбарын таһынан, Ил Түмэн икки быыбардыыр уокуругар куоластааһын барбыта. Ону сэргэ 29 улууһунан 76 муниципальнай быыбар ыытылынна.

– Быыбардар түмүктэннилэр. Билигин хас биирдии быыбардыыр учаастактарга куоластары ааҕыы саҕаланна. Уһук Илин федеральнай уокурук быыбары бастакынан түмүктүүр. Сорох эрэгийиэннэргэ биир-икки чаас анараа өттүгэр быыбар түмүктэммитэ, аны чаас аҥаарынан Иркутскайга, Бурятияҕа түмүктэниэҕэ. Итинэн сиэттэрэн этиэм этэ, Арассыыйа үрдүнэн быыбардыыр учаастактар бары сабыллыбыттарын кэнниттэн биһиги барыллаан түмүгү иһитиннэриэхпит. Онон сарсыарда сэттэ чааска иһитиннэрии тахсыаҕа, – диэн бэлиэтиир Евгений Николаевич.

Ыспыраапка быһыытынан эттэххэ, Судаарыстыбаннай Дуума ааспыт быыбарыгар 2016 сыллаахха баартыйанан куоластааһыҥҥа “Биир ньыгыл Арассыыйа” куоластааччылар 54,20 % ылбыта. Оттон атын баартыйалар көрдөрүүлэрэ “КПРФ” – 13,34 %, “ЛДПР” – 13,14 %, “Сиэрдээх Арассыыйа” – 6,22 % тэҥнэспитэ. Оттон Саха сирин ыллахха, “Биир ньыгыл Арассыыйаҕа” өрөспүүбүлүкэ дьоно 46,42 % куоластарын биэрбиттэрэ. “Сиэрдээх Арассыыйа” – 15,19%, “КПРФ” – 14,35%, “ЛДПР” – 10,7% ылбыттара. Быыбарга кыттыы 48,11 % тэҥнэспитэ.

Аграфена КУЗЬМИНА, edersaas.ru

1
0