Саха сиригэр бырамыысыланнаска ыҥыраллар

Бөлөххө киир:

Бүгүн, кулун тутар 22 күнүгэр, өрөспүүбүлүкэ Ил Дархана Айсен Николаев санкция кэмигэр бырамыысыланнай тэрилтэлэр үлэлэригэр сыһыаннаах сугулааны ыытта.
Эрэгийиэн бырамыысыланнай тэрилтэлэрэ санкциянан сибээстээн үгүс уустуктары көрсүбүттэр. Ол курдук, тастан кэлэр омук саппаас чаастара, тиэхиньикэҕэ туттуллар ороскуоттанар матырыйааллар санкциянан аҕалыллыбыт буолбуттар. Ону таһынан кирэдьииккэ бырыһыан үрдээн, сыана ыараабыта моһуоктаабыт.

— Бастатан туран, бары тэрилтэлэр сөптөөх эрэсиимҥэ үлэлиэхтээхтэр. Бу биһиги бастакы сорукпут буолар. Иккиһинэн, төһө кыалларынан кинилэри уонна инвестиционнай бырагыраамалары хааллара сатыахтаахпыт, — диэн Айсен Сергеевич бэлиэтээтэ.
Сугулааҥҥа СӨ бырамыысыланнаска уонна геологияҕа миниистирэ Максим Терещенко, «Сахатранснефтегаз» генеральнай дириэктэрэ Алексей Колодезников, «Алроса» АХ генеральнай дириэктэрин бастакы солбуйааччы – толорооччу дириэктэр Игорь Соболев, «Колмар» генеральнай дириэктэрэ Артем Левин кыттыыны ыллылар.
Тэрилтэ салайааччылара бу сыллааҕы былаан туолуоҕа диэн бэлиэтээтилэр. Ону сэргэ, «Колмар» генеральнай дириэктэрэ Артем Левин этэринэн, «Колмарга» билигин чох хостооһунугар 1300 үлэһит илии тиийбэт эбит. Ону таһынан байытар фабрика тутуллан бүтэн үлэҕэ киирдэҕинэ 1600 исписэлиис наада буолуоҕун эппит.
Ил Дархан Айсен Николаев бырамыысыланнас тэрилтэтин үлэһит илиинэн хааччыйыыга үлэни күүһүрдүүгэ уонна «Колмар» тэрилтэҕэ исписэлиистэри бэлэмнииргэ, үлэни тэрийэргэ бырабыыталыстыбаҕа сорудахтаата. Артем Левин Казахстантан, Кыргызтантан чох хостуур бырамыысыланнаска кубуотаны үрдэтии туһунан этиитин толкуйдуохпут диэтэ. Билигин сир баайын хостуур тэрилтэлэр саппаас чааска экономия эрэсиимигэр киирбиттэр. Инньэ гынан тиэхинньикэҕэ сөптөөх саппаас чаастары санкцията суох сирдэртэн сакаастыырга үлэ ыыталлар.

Сугулаан түмүгэр Ил Дархан Айсен Николаев тас дойдулары кытта сибээс министиэристибэтин кытта үлэлэһэн доҕордуу сыһыаннаах дойдулары кытта ситимнэһэн, тиэхиньикэнэн, саппаас чааһынан хааччыйар саҥа логистическай хайысханы толкуйдуур туһунан өрөспүүбүлүкэ бырабыыталыстыбатыгар сорудахтаата.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0