Балаҕан ыйын 14-24 күннэригэр Саха сиригэр ойуур баһаарыгар сылдьыбыт дьоҥҥо босхо мэдиссиинискэй көрүү оҥоһуллуоҕа. СӨ Бырабыыталыстыбатын ыҥырыытынан, Сибиирдээҕи научнай-килиниичэскэй киинтэн анал биригээдэ Дьокуускайга кэлэн үлэлии сылдьар.
Ол курдук, Мэдиссиинэ, биология федеральнай ааҕыныстыбатын салайааччы Вероника Скворцова көмөтүнэн, билигин Саха сиригэр Сибиирдээҕи научнай-килиниичэскэй киинтэн 13 исписэлиис кэлэн үлэтин саҕалаата. Бүгүн Сибиирдээҕи киин генеральнай дириэктэрэ Борис Баранкин СӨ Бырабыыталыстыбатын бэрэссэдээтэлин Андрей Тарасенконы кытары көрүстэ. Кини бэлиэтииринэн, быраастар, бастатан туран, ойуур баһаарыгар сылдьыбыт дьону көрүөхтэрэ. Ону таһынан COVID-19 дьаҥынан ыалдьыбыт дьону эмтээһиҥҥэ көмө буолуохтара.
Санатан эттэххэ, Дьокуускайга уонна Мииринэйгэ атырдьах ыйыттан алта анестезиолог-реаниматолог быраастар кэлэн үлэлии сылдьаллар. Эбии тоҕус реанимациялыыр куойка арыллыбыта.
Премьер-миниистир Андрей Тарасенко бэлиэтээбитинэн, билигин өрөспүүбүүлүкэ үрдүнэн ойуур баһаарыгар кыттыбыт дьон доруобуйатын көрүү саҕаланан эрэр. Көрдөрүнүөн баҕалаахтар Дьокуускайга 3-с нүөмэрдээх балыыһаҕа, ону таһынан улуус киин балыыһаларыгар көрдөрүнүөххүтүн сөп.
Аграфена КУЗЬМИНА.