Саха сиригэр бултааһын болдьоҕо уларыйыа дуо?
Сэтинньи 17 күнүгэр бастакы вице-премьер Алексей Колодезников ыыппыт Саха сирин Бырабыыталыстыбатын иһинэн Булка уонна булт хаһаайыстыбатыгар сэбиэтин мунньаҕар, өрөспүүбүлүкэ Ил Дарханын “Көҥүллэнэр булт көрүҥнэрин быһаарыы уонна Саха Өрөспүүбүлүкэтигэр бултуур сирдэргэ бултааһыны ыытыы параметрдарын туһунан” Ыйааҕын бырайыагын көрдүлэр.
2021 сыл тохсунньу 1 күнүттэн күүһүгэр киирэр Арассыыйа Федерациятын Булт саҥа быраабылаларыгар сөп түбэһиннэрэн, өрөспүүбүлүкэҕэ көҥүллэнэр бултааһын көрүҥнэрэ уонна туһааннаах бултуур сирдэргэ бултааһыны ыытыы параметрдара чопчуланыахтаахтар.
СӨ Экология, айылҕаны туһаныы уонна ойуур хаһаайыстыбатын миниистирин солбуйааччы Николай Додохов бэйэтин иһитиннэриитигэр, саҥа быраабылаҕа олоҕуран куобахха, мас көтөрүгэр уонна бөрөҕө ахсаанын сүрүннүүр сыалтан, туһаҕынан бултааһын көҥүллэммитин эттэ. Манан сибээстээн, нормативнай-быраап аактатын бырайыагар туһах көрүҥэ уонна туһахтыахха сөптөөх өрөспүүбүлүкэ оройуоннара көрүлүннүлэр.
Маны сэргэ сырдатар тэриллэри, тепловизордары, түүн кыыллары көрүөххэ сөптөөх тэриллэри туһаныыны хааччахтыырга этиллэр.
Тайахха, хотугу кыыл табаҕа, хагдаҥ эһэҕэ, андаатарга, көтөр кынаттаахха, тыыннаах кустары мончуук курдук олордон кини саҥатыгар ыҥыран атыыр кустары бултааһын болдьоҕор уларытыылары киллэрэргэ этии киирдэ.
Мунньаҕы түмүктүүрүгэр Бырабыыталыстыба Бэрэссэдээтэлин бастакы солбуйааччы Алексей Колодезников туһааннаах министиэристибэҕэ оройуоннартан киирэр уонна исписэлиистэр булт болдьоҕор киллэрэр этиилэрин көрөллөрүгэр уонна Сэбиэт мунньаҕар бу уларыйыылары чопчулуурга сорудахтаата.
СӨ Ил Дархан уонна Бырабыыталыстыба пресс-сулууспата.
Бэлэмнээтэ Женни Стрюкова
Хаартыска: интэриниэттэн