Саха сиригэр бородуукта сыанатын олоҕо суох үрдэтии иһин 58 административнай дьыала көбүтүлүннэ
Өрөспүүбүлүкэҕэ бородуукта сыанатын сиэрэ суох үрдэтии иһин 58 административнай дьыала көбүтүлүннэ. Бу туһунан Саха сирин Сыана бэлиитикэтигэр судаарыстыбаннай кэмитиэтэ иһитиннэрдэ.
“Бүгүҥҥү күҥҥэ биһиэхэ “итии линиянан” сыананы үрдэтиигэ 441-дэ эрийдилэр. Итинтэн 174-гэр үҥсүүнү ыллыбыт. Бүгүҥҥү туругунан, бородуукта сыанатын олоҕо суох үрдэтии иһин киирбит үҥсүүлэринэн 58 административнай дьыала көбүтүлүннэ. Социальнай суолталаах бородуукталарга аһары үрдэппит тэрилтэлэр ыстарааптаныахтара. Өссө үҥсүү киирдэҕинэ, хаттаан ыстарааптаныахтара”, — диэтэ Сыана кэмитиэтин салайааччыта Антонина Винокурова.
Урут Сыана судаарыстыбаннай кэмитиэтэ административнай дьыаланы бэйэтэ көбүтэр кыахтаах буоллаҕына, бу сыл кулун тутар 10 күнүттэн Бэрэбиэркэни ыытыы тохтотуллубутун (мораторий) туһунан РФ Бырабыыталыстыбатын уурааҕа тахсан, маннык быраап тохтотуллубута диэн кини бэлиэтээтэ. Ол иһин Сыана судаарыстыбаннай кэмитиэтэ үҥсүүнэн киирбит бары матырыйааллары кулун тутар 11 күнүттэн өрөспүүбүлүкэ Борокуратууратыгар административнай дьыаланы көбүтүүгэ салгыы үлэлииллэригэр анаан ыытар.
Бүгүн Саха сирин бары оройуоннарыгар Сыана кэмитиэтин тарыыпка агеннара үлэлииллэр. Кинилэр өрөспүүбүлүкэ Борокуратууратын бэрэбиэркэлэригэр кыттыахтара. Бу миэрэ дьон үҥсүүтүгэр суһаллык дьаһанарга көмөлөһүөҕэ, тоҕо диэтэххэ, бу иннинэ биэдэмистибэ бэрэбиэркэлэри ыйытыгынан эрэ ыытар буоллаҕына, Борокуратуура бэрэбиэркэни быһаччы миэстэтигэр тиийэн ыытыаҕа.
Ханнык баҕарар гражданин ас-үөл табаарыгар сыананы үрдэтии туһунан “суһал линия” 122 нүөмэригэр (эбилик нүөмэр 6) эрийэн үҥсүөн сөп. Үҥсүүнү көрөн баран, өрөспүүбүлүкэ Борокуратууратыгар ыытыахтара.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан