От ыйын 3 күнүгэр өрөспүүбүлүкэҕэ аан бастаан ыытыллыбыт “Төрүччү төлкөтө” сийиэс 27 улуустан 400-тэн тахса дэлэгээти, элбэх кыттааччыны, сэҥээрээччини түмтэ. Тэрийээччилэр, бу аһаҕас сийиэскэ күүтүллүбүтүттэн үгүс киһи кэлбитэ төрүччүнү оҥоруу Саха сиригэр кэҥээн, тэнийэн иһэрин туоһулуур диэтилэр.
Эрдэ иһитиннэрбиппит курдук, сарсыардаттан үс сиринэн сиэксийэлэринэн үлэ барда. Онтон 12 чааска Ем.Ярославскай аатынан Судаарыстыбаннай мусуой тэлгэһэтигэр, Төрүччүттэр бастакы сийиэстэригэр аналлаах, харысхал бэлиэлээх, оһуордаах-мандардаах, үөһээ өттүгэр хотойдоох “Өбүгэ сэргэтэ”, сахалыы сиэр-туом тутуһуллан, Алгысчыт Кулан алгыһынан, дьоһуннаахтык туруорулунна. Бу өйдөбүнньүк сэргэни, нэһилиэк төрүччүтүн электроннай архыыбын оҥорууга өрөспүүбүлүкэҕэ биир бастакынан ылсыбыт Нам улууһун Хатырык нэһилиэгин (баһылык А.М.Пинигин) уран уустара оҥорбуттар.
Күн иккис аҥарыгар Суорун Омоллоон аатынан Опера уонна балет тыйаатырыгар сийиэс Пленарнай мунньаҕа буолла. Фойеларга быыстапка үлэлээтэ. Тэрээһини СӨ Баһылыгын уонна Бырабыыталыстыбатын Дьаһалтатын Олохтоох бэйэни салайыныыга департаменын салайааччы э.т. Афанасий Владимиров иилээн-саҕалаан ыытта.
“Төрүччү төлкөтө” сийиэс сүрүн дакылаатын Саха сиригэр Төрүччү электроннай архыыбын оҥоруу идиэйэтин ааптара, СӨ Наукаларын академиятын ассоциированнай чилиэнэ-Хотугу омуктар төрүччүлэрин үөрэтэр-чинчийэр уопсастыбаннай научнай институт дириэктэрэ Константин Аргунов оҥордо. Кини биэс сыл устата туох оҥоһуллубутун уонна инники былааннары дэлэгээттэргэ сиһилии билиһиннэрдэ.
— Саха сиригэр төрүччүнү оҥоруу географията кэҥээтэр кэҥээн, суолтата улаатан иһиэҕэ. Муниципальнай тэриллиилэр баһылыктарын кытта бииргэ үлэлэһиигэ Сөбүлэһиилэр салгыы түһэрсиллиэхтэрэ, үлэбит өссө күүһүрүө, — диэтэ Константин Ильич.
Пленарнай мунньахха “Нэһилиэктэринэн төрүччү электроннай архыыбын оҥорууга судаарыстыбаннай былаас, олохтоох салайыныы уорганнара уонна уопсастыбаннас бииргэ үлэлээһиннэрэ”, “Өбүгэлэрбит духуобунай нэһилиэстибэлэрин холобурдарыгар ыччаты патриотическай иитии”, “Саха сирин норуоттарын ХVII-ХIХ үйэлэрдээҕи аҕа уустарын төрүччүлэринэн сибээстэрэ” тиэмэлэргэ ыытыллыбыт сиэксийэлэр салайааччылара иһитиннэрии оҥордулар. Модератордар сиэксийэлэргэ дьон олус көхтөөхтүк кыттыбытын, бу чахчы норуот бырайыагын салгыы ситиһиилээхтик олоххо киллэриигэ үгүс этиилэри киллэрбиттэрин бэлиэтээтилэр. Холобур, үгүс дэлэгээт Төрүччүнү оҥорооччулар холбоһуктарын тэрийэргэ этии киллэрбитин мустубут дьон өйөөтө.
Үгэс курдук, төрүччүнэн сүрүннээн аҕа көлүөнэ дьарыктанар, ол эрээри, кэнники кэмҥэ эдэр ыччат эмиэ бу дьыалаҕа кыттан эрэрэ үөрдэр. Ол курдук, сийиэскэ Амма улууһун Сатаҕай орто оскуолатын үөрэнээччитэ Светлана Адамова оскуола оҕолоро көхтөөхтүк үлэлээн, төрөөбүт нэһилиэктэрин төрүччүтүн оҥорон, электроннай архыыпка киллэрбиттэрин кэпсээбитин дэлэгээттэр хайгыы иһиттилэр.
Төрүччүнү оҥорууга кылааттарын киллэрэр кыраайы үөрэтээччилэр, култуура, үөрэх үлэһиттэрэ, бэтэрээннэр “Гражданнар көҕүлээһиннэрин сайыннарыыга кылааттарын иһин” бэлиэнэн, Махтал Суруктарынан наҕараадаланнылар.
Сийиэс туһааннаах резолюция ылынна.
Татьяна МАРКОВА, «Саха сирэ» хаһыат, edersaas.ru