«СӨ Бырабыыталыстыбатын уочараттаах мунньаҕар бэҕэһээ, ахсынньы 25 күнүгэр Хаҥалас уонна Өлүөхүмэ улууһугар баар «Бачык», «Кэтэмэ», «Еланка» уонна «Титириктээх» ураты харыстаныллар айылҕа сирин тэрийии туһунан балаһыанньа бигэргэннэ. Бу өрөспүүбүлүкэ бастакы геологическай паарката буолуоҕа”, — диэн билиһиннэрдэ Экология, айылҕаны туһаныы уонна ойуур хаһаайыстыбатын миниистирэ Сахамин Афанасьев.
edersaas.ru
500 мөлүйүөн сыл анараа өттүгэр манна сылаас уулаах Кембрийскэй муора кытылыгар бастакы хамсыыр харамайдар: трилобиттар, археоциаттар, брахиоподтар, хиолиттар о.д.а. үөскээбиттэрэ. Ол муора былыр үйэҕэ уолан, билигин мэҥэ таастар эрэ хаалбыттар. Бу көстүү аллараа кембрий стратиграфическай кэрэһитэ.
Исписэлиистэр этэллэринэн, бу таастары, Айылҕа Мэҥэлэрин наука чинчийиэн, ону таһынан, экологическай (палеонтологическай) туризмы сайыннарыахха сөп.
Санатан эттэххэ, «Кембрий» геологическай паарканы тэрийии туһунан 2017 сыллаахха от ыйын 7 күнүгэр Ил Дархан Егор Борисов уонна ЮНЕСКО генеральнай дириэктэрэ Ирина Бокова аан дойду таһымнаах сөбүлэһии (коммюнике) түһэрсибиттэрэ. Онно олоҕуран, Саха сиригэр бастакы геологическай паарка тэриллиэҕэ.
Марианна Тыртыкова, «Саха сирэ», edersaas.ru