Саха сиригэр «Авиалесоохрана» 160 парашютист-десантнига эбии кэлиэҕэ.
«Авиалесоохрана» ФБУ баһаарынай сулууспатыттан 160 парашютист-десантник кэлэр.. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы — өрөспүүбүлүкэҕэ ойуур хаһаайыстыбатын сүрүн үлэһитэ Андрей Коноплев иһитиннэрдэ.
Бэс ыйын 23 күнүттэн Саха сиригэр ойуур баһаарыттан уһулуччу бэлэмнээх буолуу эрэссиимэ киллэриллибитэ, атын эрэгийиэннэртэн эбии күүстэр ыҥырыллыбыттара. Билиҥҥи туругунан өрөспүүбүлүкэҕэ «Авиалесоохрана» ФБУ парашютнай-десантнай баһаарынай сулууспа (ПДПС) 260 үлэһитэ Бурятия, Чита, Амур, Саха сирин уонна Приволжье салааларыттан ойуур уотун умуруорууга үлэлии сылдьаллар.
«Чугастааҕы кэмнэргэ эбии 160 киһи Приморьеттан, Хабаровскайтан, Читаттан уонна Бурятияттан кэлэллэрин күүтэбит», — диир Коноплев. Кини этэринэн, Томпоҕо, Уус Маайаҕа, Өлүөхүмэҕэ улуустарыгар ыксаллаах быһыы-майгны эрэсиимин биллэриэххэ сөп. Оттон Мииринэйгэ ыксаллаах быһыы-майгы эрэсиимэ салҕанар.
«Сыл ахсын бэс ыйын бүтүүтүттэн ойуурга турбут уот улаатар кутталланар. Салгын температурата үрдүүр уонна сиик кырыымчыгырар. Баһаартан кутталлаах буолуу сезона ыган кэллэ. Этиҥ элбиирэ номнуо Алдан, Нерюнгри, Томпо уо.д.а. оройуоннарга бэлиэтэнэр», — диир кини.
Ойуур хаһаайыстыбатыгар сүрүн эппиэттээх бэлиэтииринэн, бүгүҥҥү күн туругунан Саха сиригэр 78676,7 гектар иэннээх сиринэн 29 ойуур баһаара ыйыллар. Ааспыт сылы кытта тэҥнээтэххэ, былырыын баччаларга 175 ойуур баһаара бэлиэтэнэн турар.
Билигин 16 ойуур баһаарын умуруорууга үлэ ыытыллар, итинтэн 10 хонтуруолланар зонаҕа баар. Ойуур уотун умуруорууга 657 киһи, 23 көлө үлэлиир.
+1
+1
+1
+1
+1
+1
+1