Бэҕэһээ Арассыыйа бэрэсидьиэнэ Владимир Путин эрэгийиэн баһылыктарын кытта мунньахтаабыта. Бу мунньахха Ил Дархан Айсен Николаев ойуур баһаардарын умуруорууга этиилэрин киллэрбитэ. Биир туруорсуу быһыытынан этиллибит санаата – ойуур баһаарын утары охсуһууга көтөр аалынан ардаҕы ыҥырыы ордук көдьүүстээх миэрэ буолбутунан сибээстээн, Саха сиригэр манна анаммыт көтөр аал наадатын эттэ.
— Ойуур баһаардарын умуруорууга Авиалесоохрана «Веер» диэн оборудованиелаах көтөр аала улаханнык көмөлөспүтэ. Маннык көтөр ааллар дойду үрдүнэн тарбахха баттанар ахсааннаахтар. Билигин эрэгийиэннээҕи авиахампаанньа баазатыгар Ан-26 сөмөлүөккэ искусственнай ардаҕы аҕалар установканы туруорууга үлэ ыытыллар. Маны таһынан РФ Ойуур кодексыгар уларытыылар киириэхтэрин наада. Ол курдук, искусственнай ардаҕы аҥаардас ойуур баһаардарын умулларыыга эрэ буолбакка, хонтуруолга сылдьар ойуурга баһаар тахсар кутталын кыччатарга эмиэ туһаныахха наада. Онон Саха сирин пилотнай эрэгийиэн быһыытынан көрөргүтүгэр этии киллэрэбин.
Халлаан сөҥүүтүн ыҥырар кыахтаах “Атмосфера” модификациялаах Ан-24 сөмөлүөт ФГУП «ГосНИИГА» анал тэриллэрин таҥыы, тургутуу кэнниттэн, 2022 сыл балаҕан ыйыгар Саха сиригэр кэлиэн сөбө билиннэ.
Бу сөмөлүөт оҥоһуллар кэмигэр, ыам ыйын 13 күнүттэн бэс ыйыгар диэри Саха сиригэр Як-42 лабораториялаах көтөр аал сулууспалыаҕа, оттон бэс ыйыттан атырдьах ыйыгар тиийэ Ан-30 солбуйуоҕа. Уопсайа 130 чаас араас аналлаах үлэлэри (ол иһигэр ардах ыҥырар үлэни) оҥоруохтара.
Хаартыска sakha.gov.ru
https://t.me/YakutiaOpershtab/8705