Бүгүн, кулун тутар 22 күнүгэр, Арассыыйа норуодунай артыыһа, Малай тыйаатыр артыыһа Людмила Титова Саха сиригэр кэллэ. Кини Саха сирин култууратын, Саха академическай тыйаатырын үлэтин кытта билсиэҕэ. Людмила Владимировна М.С.Щепкин аатынан театральнай училищеҕа үөрэнэр алтыс саха устуудьуйатын уус-уран салайааччыта буолар.
Людмила Владимировнаны Дьокуускай аэропуордугар CӨ култуураҕа уонна духуобунай сайдыыга миниистирин солбуйааччы Марина Силина, Саха тыйаатырын дириэктэрэ Петр Макаров уонна тыйаатыр сүрүн режиссера Руслан Тараховскай көрүстүлэр.
«Куораппытыгар Людмила Владимировнаны көрсөрбүтүттэн наһаа үөрэбит. Кини Дьокуускайга Сургуттан кэллэ. Саха сиригэр бастакытын үктэннэ. Бу сырыытын сүрүн сыалынан Саха сирин тыйаатырын кэллэктиибин, репертуарын кытта билсии буолар», — диэн Марина Силина кэпсиир.
Норуодунай артыыс Саха сиригэр кулун тутар 25 күнүгэр диэри ыалдьыттыыр. Бу күннэргэ кини Саха тыйаатырын сыанатыгар «Хаарыан хампа күөх кытылым», «Кээрэкээн Ойуун», «Театрга буолбут түбэлтэ» туруоруулары, итиэннэ Олоҥхо тыйаатырын «Дьырыбына Дьырылыаттатын» көрүөҕэ. Итиэннэ Андрей Борисов «Культурная эволюция» биэриитигэр ыалдьыттыаҕа, артыыстары, устудьуоннары уонна үөрэтэр оҕолорун төрөппүттэрин кытта көрсүөҕэ.
СӨ Култуураҕа уонна духуобунай сайдыыга министиэристибэтин пресс-киинэ.
Хаартыскалары пресс-киин тиксэрдэ.