Саха сиригэр Арассыыйа национальнай тыйаатырдарын бастакы кэнгириэһэ арыллыаҕа
САССР 100 сылын бэлиэтээһин чэрчитинэн, «Арассыыйа мин устуоруйам» историческай пааркаҕа бэс ыйын 22-25 күннэригэр Арассыыйа национальнай тыйаатырдарын бастакы кэнгириэһэ ыытыллыаҕа. Бу тэрээһини Дьокуускайга ыытар туһунан быһаарыы Арассыыйа национальнай тыйаатырдарын ассоциациятын олохтуур кэмпириэнсийэтигэр ылыллыбыта. Саха сирин баһылыга Айсен Николаев бу көҕүлээһини өйөөбүтэ.
СӨ Култууратын министиэристибэтэ биллэрэринэн, кыттыыны ылалларын туһунан 36 тыйаатыр художественнай салайааччылара бигэргэппиттэр. Тэрээһин сүрүн сыала – национальнай тыйаатырдар Арассыыйа тыйаатырдарын эйгэтигэр сайдар суолларын көрдөөһүн буолар.
Кэнгириэс күннэригэр Бурятияттан Сойжин Жамбалова, Башкортостантан Ильшат Мухутдинов, Татарстантан Гульназ Минкина, Саха сириттэр Роман Дорофеев режиссердар бырайыактарыгар бэйэлэрин омуктарын культурнай бэлиэлэрин арыйан көрдөрүөхтэрэ.
СӨ Култуура уонна духуобунас миниистирэ Юрий Куприянов этэринэн, хас биирдии режиссер бу үлэтигэр биэстии артыыһы талан ылан санаабытын олоххо киллэриэҕэ. Артыыстар Саха тыйаатыра, Олоҥхо тыйаатыра, Эдэр көрөөччү тыйаатыра, Ньурба тыйаатыра уонна АГИКИ устудьуоннарыттан талыллыахтара. Кыайыылаахтар Национальнай тыйаатырдар Ассоциацияларын былаһааккаларыгар испэктээк туруорар быраабы ылаллар.
Ону таһынан өрөспүүбүлүкэ киин куоратыгар Александринскай тыйаатыр күннэрэ ыытыллыахтара. Аатырбыт кэлэктиип бэс ыйын 24-25 күннэригэр Саха тыйаатырын сыанатыгар “Кэргэн кэпсэтии” испэктээги туруоруохтара.
edersaas.ru