Аккумулятордары таҥыыга улахан суолталааҕа билиннэ

Ааптар: 
Бөлөххө киир:

1946 сыллаахха  Санкт-Петербургдааҕы университет уонна РАН Кольскайдааҕы научнай киинин учуонайдара Дьааҥы оройуонун Көстөрдөөҕү хорҕолдьун хостуур сиргэ  саҥа минералы булбуттара.

Ол минералы академик, аатырбыт сэбиэскэй геолог, урууданан хостооһун минерология салаатыгар бөдөҥ исписэлиис  Сергей Смирнов аатынан  “сергейсмирновит” диэн ааттаабыттара. Санкт-Петербургдааҕы университет пресс-сулууспата иһитиннэрбитинэн, “сергейсмирновит” минерал аккумулятордары оҥорууга туттуллуоҕун сөбүн туһунан быһаарыллыбытын иһитиннэрдэ.  Хорҕолдьуну хостуур сири  арыйбытын иһин академик Сергей Смирнов  Сталинскай биримэйэ лауреатынан буолбута. “Сергейсмирновит” минерал  магний, цинк уонна фосфор булкаастаах.

Дьааҥы «Көстөрө» ГУЛАГ хаайыылаахтара  хорҕолдьун уруудаларын хостуур сирдэрэ этэ.  Бу сиргэ хас да минералы булан тураллар.  Ол курдук, Санкт-Петербургдааҕы университет кафедратын профессора, РАН Кольскайдааҕы научнай киинин генеральнай дириэктэрэ Сергей Кривовичев бэлиэтииринэн, «батагаит» ГУЛАГ устуоруйатын, «епифановит,  сергейсмирновит» Дьааҥыга Көстөргө үлэлээбит учуонайдары үйэтитии  буолар.  50 сыл буолан баран, хаттаан үөрэтиллэ сылдьан, аккумулятордары оҥорууга олус туһалаах  «сергейсмирновит»  (MgZn2(PO4)2•4H2O) минерал Көстөргө булуллубут 4-с минералынан буолар.

Онон дойду бородууксуйатын оҥорон таһаарыы кэмигэр Саха сиригэр булуллубут минерал аккумулятордары таҥыыга улахан суолталааҕа билиннэ.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0