Саха сиригэр ааспыт сууккаҕа 439 тыһыынча гектардаах 15 ойуур баһаарын умуруордулар

Авиалесоохрана суһал дааннайдарынан, Саха сиригэр 50 ойуур баһаара баар. Суукка иһигэр 439 тыһыынча гектардаах 15 баһаар умуруорулунна. Уоту кытта охсуһууга 2,2 тыһыынча киһи уонна 287 тиэхиньикэ үлэлиир диэн тустаах биэдэмистибэ пресс-сулууспата иһитиннэрэр.

Өргөлөөх, Үөдэй, Петропавловскай, Мэлдьэхси нэһилиэнньэлээх пууннарыгар уонна «Өлүөнэ очуостара» заповедникка Арассыыйа ЫБММ исписэлиистэрэ үлэлииллэр. Минерализованнай балаһаны кэҥэтиигэ, уоту умуруорууга уонна бохсууга үлэ ыытыллар. ЫБММ авиацията Уус Майаҕа уонна Хаҥаласка үлэлээтэ, 369 туонна уу кутулунна.

«Нэһилиэнньэлээх пууҥҥа кутталы суоһуур ойуур баһаара суох. 10-ча км тэйиччи сиргэ биэс ойуур баһаара баар, онтон үһэ бохсулунна. ЫБММ исписэлиистэрэ Уус Майаҕа, Хаҥаласка, Чурапчыга үлэлииллэр, Дьокуускайтан баһаарынайдар Петропавловскайга бардылар. Күн-дьыл туругуттан көрөн, Элдьикээҥҥэ, Петропавловскайга уонна «Өлүөнэ очуостарыгар» авиацияны туһаныахпыт», — диэн СӨ ЫБММ сүрүн управлениетын начаалынньыга Павел Гарин иһитиннэрэр.