СӨ Тыйаатырдарын диэйэтэллэрин түмсүүтэ уонна Ресурснай бырайыактыыр киин СӨ Култуураҕа министиэристибэтин өйөбүлүнэн кулун тутар 30 күнүттэн муус 3 күнүгэр диэри Саха сиригэр режиссердар сэминээрдэрин аан бастакытын ыыттылар.
СӨ Тыйаатырдарын диэйэтэллэрин түмсүүтэ Ресурснай бырайыактыыр киини кытары ыкса үлэлэһэн үс сылтан бэртэх улахан үлэни оҥороллор. Санатан эттэххэ, 2019 сыллаахха Драматургия сэминээрин ыыппыттара, ол түмүгэр кыттааччылар айымньыларынан пьеса хомуурунньуга тахсан эрэр.
2020 с. тыйаатыр кириитиктэрин уонна суруналыыстары, блогердары үөрэтэр сэминээргэ театровед, кириитик, ГИТИС преподавателэ, режиссер уонна драматург Александр Вислов уонна тыйаатыр кириитигэ Татьяна Тихоновец кэлэн барбыттара. Олус сэргэх үөрэҕи ыыппыттара.
2021 сылга режиссердар сэминээрдэригэр Санкт-Петербургтан театровед, искусствоведение хандьыдаата, доцент Юлия Клейман, Тюмень куораттан тыйаатыр кириитигэ, продюсер, преподаватель Александрина Шаклеева икки күн солбуһа сылдьан олохтоох режиссердарга лиэксийэ аахтылар. Юлия Клейман Америка авангардын уонна ону тыйаатырга хайдах туһаныахха сөбүн туһунан, тыйаатыр технологиятын уонна аныгы сыанаҕа үлэ туһунан бэрт сонун үөрэҕи ыытта. Салгыы Александрина Шаклеева Арассыыйа аныгы эдэр режиссердарын уонна оҕолорго, улаатан эрэр оҕолорго ханнык аныгы литератураҕа болҕомто уурар туһунан кэпсээтэ. Оҕо тыйаатырыгар туох тиийбэтин сиһилии быһаарда.
Режиссердар сэминээрдэрин үһүс күнүгэр киинэ уонна тыйаатыр режиссера, “ГОСТ” ыччат тыйаатырын уонна Прага “Студия КСИ” тыйаатырын ааптара Александр Созонов иммерсивнэй тыйаатыр туһунан үөрэҕин саҕалаата. Иммерсивнэй тыйаатыр сүрүн уратытынан көрөөччү испэктээккэ кыттыыта буолар, бу олус интэриэһинэй уонна саҥа аныгы тыйаатыр туһунан үөрэҕи режиссердар олус сэргээтилэр. Иммерсивнэй тыйаатырга бэйэлэрин идиэйэлэрин барылын толкуйдаан иһитиннэрдилэр уонна истээччилэр иннилэригэр көмүскээтилэр. Тута ырытыһыы түмүгэр Александр Созонов режиссердар сыыһаларын ыйан, хас биирдиилэригэр сүбэ-ама биэрдэ. Ити курдук олус көхтөөхтүк үлэлээн Саха сирин режиссердара билиилэрин хаҥатан, идэлэригэр эбии үөрэнэн, үрдэтиммиттэрин туһунан туоһу суруктарын тутан, үөрэн-көтөн тарҕастылар.
Режиссер Александр Созонов саха дьоно-сэргэтэ ыалдьытымсахтарын сөҕө-махтайа бэлиэтээтэ. Бастакытын режиссердарга маастар-кылаас ыыппытын, инникитин даҕаны бииргэ үлэлэһиэн баҕарарын биллэрдэ.
Өрөспүүбүлүкэ араас муннуктарыттан мустубут режиссердар лиэксийэлэри болҕойон иһиттилэр, маастар-кылааска көхтөөхтүк кытыннылар. Сэминээр түмүгүнэн режиссер идэтин үрдэтиннилэр.
Надежда Ильина, edersaas.ru
Василий Кривошапкин хаартыскалара.