Саха сиригэр аан бастаан коронавируһунан ыалдьыбыт киһиэхэ антиковиднай плазманы куттулар. Бу плазманы коронавируһунан ыалдьан үтүөрбүт донор хааныттан ылаллар. Плазманы өрөспүүбүлүкэтээҕи хааны кутар станцияҕа оҥордулар.
Маннык ньыма ыарахан туруктаах ыарыһахтарга туттуллар. Аан дойдуга бу коронавируһу эмтиир ньыма көдьүүстээҕин көрдөрбүтэ.
Коронавируһунан ыалдьан үтүөрбүт киһи хааныгар инфекцияны утары охсуһар “антитела” диэннэр үөскүүллэр, кинилэр ыарыыны утары охсуһаллар, иммунитеты бөҕөргөтөллөр. Донор атын ыарыыта суох буолуохтаах. Маны тэҥэ, ыарыһаҕы атын эмтэринэн кэлимник эмтииллэр.
Өрөспүүбүлүкэтээҕи килиниичэскэй балыыһа быраастара кэпсээбиттэринэн, пациентка коронавирус содулунан ыараханнык сэбиргэхтэппит (пневмония), онон туруга мөлтөх эбит. Доруобуйа харыстабылын министиэристибэтэ иһитиннэрбитинэн, плазманы куппуттарын кэннэ, дьахтар туруга тупсан эрэр.
Ангелина Васильева, “Саха сирэ” хаһыат, edersaas.ru
+1
+1
+1
+1
+1
+1
+1