От ыйын 20 күнүнээҕи туругунан, өрөспүүбүлүкэ үрдүнэн барыта 14 438 га иэннээх аҕыс ойуур баһаара умуруорулунна: Бүлүүгэ, Уус Майаҕа, Дьааҥыга, Мииринэйгэ, Алдаҥҥа уонна Өлөөҥҥө.
29 440,3 га иэннээх 54 ойуур баһаара баар: Ньурбаҕа — 1, Эдьигээҥҥэ — 1, Орто Халымаҕа — 1, Өймөкөөҥҥө — 2, Үөһээ Бүлүүгэ — 2, Уус Майаҕа — 11, Нерюнгригэ — 12, Алдаҥҥа — 24. Маны кытта 775 га иэннээх икки ландшафтнай баһаар Өймөкөөҥҥө баара биллэр. Былырыын баччаларга 1 519 431,2 га иэннээх 208 ойуур баһаара баара.
Баһаары умуруорууга 461 киһи үлэлиир. Мантан 340 киһи — баһаарынай сулууспа парашютнай десаанын үлэһитэ, 63 киһи — ойуур баһаардарын сулууспатын үлэһитэ, 22 киһи — ГПС үлэһитэ уонна 36 олохтоох дьон. Барыта 29 тиэхиньикэ баар.
Саха сирин киин чааһыгар Хабаровскай кыраайга буола турар ойуур баһаарын буруота кэллэ.