Өрөспүүбүлүкэбитигэр 72 гибриднэй электро-ыстаансыйа тутуллара күүтүллэр. Бу туһунан Ил Дархан Айсен Николаев Илиҥҥи экэнэмиичэскэй форум былаһааккатыттан «Россия 24» телехаанлга интервьютугар иһитиннэрдэ.
Саха сирэ киин энергетическэй комплекстан тутулуга суох, туспа хааччынар 143 эбийиэктээх эрэгийиэн буолар. Онон дьону уотунан, сылааһынан хааччыйар энергетикэтин саҥалыы сайыннарыы биһиэхэ тыын боппуруос буолар.
— «РусГидро» хампаанньаны кытта уонна Бырабыыталыстыба өйөбүлүнэн уустук суоллаах-иистээх сирдэргэ дизели кытта тыал уонна күн энергиятын бииргэ туттар гибриднэй ыстаансыйалары тутууну былааннаан сөбүлэҥ түһэрсибиппит, — диэн Ил Дархан эттэ.
Бэҕэһээ Муома улууһугар 4 гибриднэй ыстаансыйа үлэҕэ киирбитэ. Олортон биирдэстэрэ — Хонууга турбут 1,5 мВт күүстээх ыстаансыйа Хоту эргимтэ иһинэн күн уотун туһаҕа таһаарар аан дойдуга саамай бөдөҥ ыстаансыйанан буолар.