Саха сиригэр мэдиссиинэ, тутуу уонна суол хаһаайыстыбатын каадырын бэлэмнээһин үлэтэ күүһүрүөҕэ. Ити туһунан СӨ үөрэҕин уонна наукатын миниистирин эбээһинэһин толорооччу Михаил Сивцев орто анал үөрэх дириэктэрдэрин кытта видеонан ыыппыт мунньаҕын кэмигэр кэпсэттилэр.
Санатан эттэххэ, Ил Дархан Айсен Николаев эпидемиологическай балаһыанньанан Эрэгийиэн экэниэмикэтин сайыннарыыны туруктаахтык хааччыйыы бастакы былааннарын тэрээһинин оҥорууга кэккэ министиэристибэлэргэ сорудахтары биэрбитэ.
СӨ Үөрэҕин уонна наукатын министиэристибэтигэр итиэннэ министиэристибэ иһинэн үлэлиир тэрилтэлэргэ мэдисиинэ, тутуу, тырааныспар салааларыгар каадыр дьипписиитин уонна исписэлиистэри биир тэҥник көрөн, өрөспүүбүлүкэ орто анал үөрэҕин тэрилтэлэригэр кылгас куурустарга бэлэмнээһиҥҥэ былаан кыраапыга оҥоһуллар. “Каадыр тиийбэтин боппуруоһун судаарыстыба, үөрэх тэрилтэлэрэ уонна үлэ биэрээччилэр уопсай тиһиктээх үлэнэн эрэ быһаарар кыахтаахпыт. Бүгүн үөрэх тэрилтэлэрин уонна Нэһилиэнньэ үлэлээх буолууга киинин кытта үлэ ресурсата тиийбэт экэниэмикэ салааларыгар каадыры толорууга үлэни саҕалыыбыт. Тутууга үлэһит тиийбэтин учуоттаан, биэс орто анал үөрэх тэрилтэтигэр (Үөһээ Бүлүүтээҕи, Ньурбатааҕы, Намнааҕы Чурапчытааҕы тиэхиньикумнарга уонна Дьокуускайдааҕы тутуу-хоммунаалынай тиэхиньикумугар) үөрэтии саҕаланна. Биһиги 148 устудьуон уонна олохтоох нэһилиэнньэ идэтин уларытыахтаахпыт. Ити тиийбэт. Кылгас кэм иһигэр араас ньыманы уонна технологияны туһанан элбэх киһини үөрэтэр быһаарыыны ылыныахтаахпыт. Сүүһүнэн буолбакка, тыһыынчанан киһини саҥаттан үөрэтиэхтээхпит. Онон бэйэҕит сыһыаҥҥытын хаттаан көрүнүҥ”, — диэн миниистир эбээһинэһин толорооччу бэлиэтээтэ.
Уустук эпидемиологическай балаһыанньанан уонна мэдиссиинэ үлэһиттэрин үлэлэрин усулуобуйата уларыйбытынан сибээстээн, орто медицинскэй үлэһит үөрэҕин квалификациятын үрдэтэргэ быһаарбыттар. РФ Доруобуйаҕа харыстабылын министиэристибэтин медицинскэй үөрэхтээһин быыстала суох порталын нөҥүө Дьокуускайдааҕы мэдиссиинэ кэллиэһин базатыгар саҥа коронавирус инфекциятын утары 1731 киһи үөрэҕи ааспыт. СӨ Доруобуйа харыстабылын министиэристибэтин чахчытынан, судаарыстыбаннай медицинскэй тэрилтэ 9 тыһыынчаттан тахса орто сүһүөх үлэһиттэрин үөрэтэр ирдэбил баар. Үөрэх уонна наука министиэристибэтэ ыам ыйыгар – бэс ыйыгар Дьокуускайдааҕы, Алданнааҕы, Нерюнгритааҕы мэдиссиинэ кэллиэстэрин, Жатайдааҕы тиэхиньикум көмөтүнэн цифровой технологияны туһанан босхо үөрэтэргэ бэлэм. Итини таһынан, мэдиссиинэ кэллиэстэрэ дезинфекцияны сөпкө оҥорууга исписэлиистэри бэлэмнээһиҥҥэ кылгас кэмнээх куурустары ыыталлар. Күн бүгүн 145 киһи квалификация ылбыт.
Эрэгийиэҥҥэ тутуу, суол хаһаайыстыбатыгар уонна мэдиссиинэ салаатыгар эрэ үлэһиттэр ирдэнэр буолбатахтарын бэлиэтиир оруннаах. “Каадырынан хааччыйыыга ситимнээх үлэ экэниэмикэ атын даҕаны эмсэҕэлээбит салааларыгар барыаҕа”, — диэн Сивцев бэлиэтээтэ.
Кылгас кэмнээх куурустарга дьону үөрэтии салҕанар. Сиһилии Саха сирин орто анал үөрэхтэрин сайтарыттан уонна социальнай ситимнэриттэн билсиэххитин сөп.
СӨ Үөрэҕин уонна наукатын министиэристибэтин пресс-сулууспата.