Саха сиригэр 84 км уһуннаах гаас утаҕын тардыыга 2,8 млрд. солк. көрүллүөҕэ

Бөлөххө киир:

Бу нэдиэлэҕэ РФ Судаарыстыбаннай  Дууматыгар пленарнай мунньах ыытылынна.  Дьокутааттар Саха сиригэр Кыһыл-Сыыртан 84 км уһуннаах  магистральнай гаас утаҕын тутууга 2,8 млрд. солк. көрөр туһунан этиини ылыннылар.  Көрүллүөхтээх үп-харчы Арассыыйа 2022 сыллаах уонна былааннаах 2023-2024 сылларга бүддьүөтүн бырайыагар киирдэ. Барылы дьокутааттар үһүс ааҕыыга бигэргэттилэр.

«Тустаах ситим тардыллыыта Саха сиригэр улахан суолталаах эбийиэгинэн буолар.    84 км уһуннаах гаас үһүс утаҕа тардыллыыта  Саха сирин  киин уонна арҕаа улуустарын  нэһилиэнньэтин, социальнай эбийиэктэрин түүннэри-күнүстэри тохтоло суох эрэллээх гааһынан хааччыйарга кыаҕу  үөскэтэр.  Иккиһинэн,  чааһынай  дьиэлэргэ гааһы холбуурга улахан көмөнү оҥоруоҕа. Өрөспүүбүлүкэ экэниэмикэтигэр улахан оруолу ылыахтаах гаас утаҕын тардыыга үп көрүллэригэр  Судаарыстыбаннай Дуума дьокутаата Галина Данчикова уонна, биллэн турар, Ил Дархан Айсен Николаев  федеральнай таһымҥа сөптөөх үлэни ыытан ситистилэр», — диэн  СӨ бырамыысыланнаска, геологияҕа миниистирэ Максим Терещенко санаатын үллэһиннэ.

Бары билэрбит курдук,  киин уонна арҕаа улуустарга «күөх төлөн”  Орто Бүлүүтээҕи гаас баайдаах сиртэн хостонуллан тиэрдиллэр.  Билигин гаас ситимин саҥардыы үлэлэрэ ыытылла тураллар.  Холобур, 2021 сыл түмүктэниэр диэри «Сахатранснефтегаз» АУо «Кыһыл-Сыыр  — Бүлүү  — Үөһээ Бүлүү» диэн 40 км уһуннаах, иккис утаҕы тардан үмүрүтүөхтэрэ. Итини тэҥэ, «Кыһыл-Сыыр – Мастаах – Бэргэ – Дьокуускай» диэн магистральнай учаастакка уопсайа 15 км уһуннаах ситими саҥардан оҥоруохтара.  Саха сиригэр улахан суолталаах гаас утаҕа 2022-2024 сс. тутуллан үлэҕэ киириэҕэ.

+1
0
+1
0
+1
0
+1
0
+1
0
+1
0
+1
0