Саха сиригэр “Облачная поликлиника” диэн ааттаах төлөпүөн сыһыарыыта үлэтин саҕалаата.
Бу сыһыарыыга бэйэни хааччахтаныыга олорор дьон доруобуйаларын туругун кэтээн көрөллөр. Кэлин “Облачная поликлиника” сыһыарыынан диспансер учуотугар турар дьону кэтээн көрүүгэ туһалаах буолуо диэн сабаҕалыыллар.
Бу сыһыарыы нөҥүө дьон быраастартан сүбэ ылар, ыарыыларын көрдөрөр кыахтаннылар диэн СӨ Инновацияҕа министиэристибэтэ иһитиннэрэр. Сыһыарыыны тургутан көрүүгэ Дьокуускайдааҕы медицина киинин, Дьокуускай куорат 3-с №-дээх балыыһатын, Ленскэйдээҕи киин балыыһатын уонна Сунтаар киин балыыһатын быраастара кытыннылар.
— Бу сервис, бастатан туран, быраастар уонна Роспотребнадзор үлэтин улаханнык чэпчэтиэхтээх. Тоҕо диэтэххэ, ыарыһахтар көрдөрүүлэрэ, докумуоннара барыта электроннай испииһэккэ тута киирэр, кумааҕыны кытта үлэ кэмэ лаппа кыччатыахтаах. Бу сыһыарыынан быраастар ыарыһахтар күннээҕи туруктарын хонтуруоллуур кыахтаннылар уонна тэйиччиттэн консультация биэриэхтэрэ, — диир СӨ Инновацияҕа, цифровой сайдыыга уонна информационнай технологияҕа миниистир Анатолий Семенов. — “Облачная поликлиника” нөҥүө бырааска суруттарыахха, бүлүтүөнү ылыахха уонна сабыахха сөп.
«Облачная поликлиника» сыһыарыыга ыарыһахтар исписэлиистэри кытта сүбэлэһэллэригэр анаан «доруобуйа күннүгүн» толоруохтара. Манна күн аайы температура уо.д.а. көрдөрүүлэри, туох ыарыы баарын-суоҕун бэлиэтиэхтээхтэр.
Сыһыарыыны https://tm.mzsakha.ru/ аадырыстан хачайдыахха эбэтэр AppStore уонна PlayMarket платформалартан булуохха сөп.
edersaas.ru