Саха сиригэр 41 тэйиччи нэһилиэк генерацияны туһанан бигэ уотунан хааччыллыаҕа
Тэйиччи сытар нэһилиэктэри уот комплексынан хайдах хааччыйаары олороллорун манна ааҕыҥ.
Арассыыйаттан тэйиччи сытар 41 нэһилиэнньэлээх пууҥҥа аныгы автономнай уот комплекстара тутуллуохтара, онно үрдүк көдьүүстээх дизельнэй уот ыстаансыйалара, ВИЭ-лар – генерация уонна уоту түмээччилэр киирэллэр, диэн “РусГидро” ПАУо саайта иһитиннэрэр.
Бүгүн тэйиччи сытар нэһилиэктэргэ ойуччу энергетиканы саҥардыы бырайыагын туһунан бырабылыанньа чилиэнэ, РусГидро генеральнай дириэктэрэ Роман Бердников Саха Өрөспүүбүлүкэтигэр оробуочай сырыынан сылдьар РФ Бырабыыталыстыбатын Бэрэссэдээтэлин солбуйааччытыгар – РФ Бэрэсидьиэнин Уһук Илин ФУо боломуочуйалаах бэрэстэбиитэлигэр Юрий Трутневка иһитиннэрдэ.
Саҥа уот комплекстарын өрөспүүбүлүкэ 9 оройуонугар тутуохтара. Саҥа дизельнэй ыстаансыйалар уопсай кыамталара 47 МВт, уот ыстаансыйалара – 14 МВт тэҥнэһэллэр. Бырайыактары “Группа ЭНЭЛТ” (13 нэһилиэккэ үлэни ыытыаҕа), “Хевел Энергосервис” ХЭТ (17 пууҥҥа) уонна “Гидроэлектромонтаж” (11 пууҥҥа) олоххо киллэриэхтэрэ. Куонкуруска кыттан кыайбыттары кытта хантараактары түһэрсибиттэр. Саҥа оборудованиены олоххо киллэрии 2022-2023 сылга былааннаммыта.
“Энергетиканы сайыннарыы Саха сирин экэниэмикэтин сайыннарыыга сүрүн соруктартан биирдэстэрэ. Өскөтүн бары эргэ көдьүүһэ суох дизельнэй генерацияны гибриднэйгэ уларыттахпытына, ороскуот 30 бырыһыан кэриҥэ аччыаҕа. Бастаан бырайыагы Саха Өрөспүүбүлүкэтигэр үлэлэтиэхпит. Дьиҥэ, бу Уһук Илин уонна дойдубут атын сирдэригэр кыра нэһилиэнньэлээх оройуоннарыгар олус суолталаах”, — диэтэ Юрий Трутнев.
Энергосервис дуогабарын чэрчитинэн автономнай уот комплекстарын оҥоруу көрүллэр, онно үрдүк көдьүүстээх дизельнэй уот ыстаансыйалара, ВИЭ-генерация киирэллэр, итиннэ күнүнэн үлэлиир уот ыстаансыйалара уонна уоту түмэр тиһиктэр киирэллэр. ВИЭ-уот ыстаансыйаларын уонна дизель-генератордары туһаныы ыарахан сыаналаах оттугу таһыыны аччатыаҕа, ону тэҥэ тулалыыр эйгэни буортулуо суоҕа. Оттугу кэмчилээһин чопчу нэһилиэнньэлээх пууҥҥа ыллахха 10-тан 70 бырыһыаҥҥа диэри.
Энергосервис дуогабардарыгар олоҕурдахха, үлэни үбүлээһини дуогабар түһэриспит инвестордар ыытыахтара. Бу уот комплекстарын Сахаэнерго үлэлэтиэҕэ. Инвестицияны төнүннэрии оттугу кэмчилээһин суотугар 10 сыл иһинэн барыаҕа, ол кэннэ энергокомплекстар Сахаэнерго бас билиитигэр көһүөхтэрэ.
Автономнай уот комплекстарын оҥорууга бастакы энергосервис дуогабардарын Саха сирин алта бөһүөлэгэр 2020 сыллаахха түһэрсиллибитэ. Ону сэргэ 25 нэһилиэнньэлээх пууҥҥа эмиэ куонкурус ыытыллар.
РусГидро бөлөҕө Уһук Илин уотун хааччыйыы киинтэн тэйбит секторыгар ойуччу энергетиканы сайыннарыы бырайыагын былааннаахтык олоххо киллэрэр. Үлэлэри “2024 сылга диэри Арассыыйа Федерациятын сайдыытын национальнай сыалларын уонна стратегическай соруктарын туһунан” Ыйааҕын балаһыанньатын толорууга олоҕурар.
Билигин Камчаткаҕа уонна Сахалиҥҥа тыал күүһүнэн үлэлиир ыстаансыйалар, ону тэҥэ Саха сиригэр күн күүһүнэн үлэлиир 21 ыстаансыйа үлэҕэ киирдэ. Ол иһигэр полярнай эргимтэҕэ саамай бөдөҥ уот ыстаансыйатын – Баатаҕайдааҕы уот ыстаансыйата. Япониятааҕы партнердарын кытта Тиксиигэ тыал күүһүнэн үлэлиир комплекс киирбитэ. Онно 900 кВт кыамталаах тыал энергетическай установкалаах.
Маны сэргэ РусГидро Саха сирин 72 нэһилиэнньэлээх пуунугар уонна Камчаткаҕа 7 сиргэ ВИЭ-ны туһанан автономнай энергокомплекстары оҥорор соруктаах. Уһук Илиҥҥэ киириэхтээх саҥа дизельнэй ыстаансыйалар уопсай кыамталара 90 МВт куоһарыаҕа, ВИЭ-уот ыстаансыйаларын киэнэ — 30 МВт.
Сахагов
Бэлэмнээтэ Женни Стрюкова
Хаартыска: архыып