Саха сиригэр «Экология» национальнай бырайыакка 2,9 миллиард үп көрүллүө
Бүгүн, ыам ыйын 16 күнүгэр, Ил Дархан Айсен Николаев бырабыыталыстыба чилиэннэрэ, Ил Түмэн дьокутааттара, сир баайын хостуур хампаанньа бэрэстэбиитэллэрэ, айылҕа харыстабылын үлэһиттэрэ кыттыылаах экологическай сүбэ мунньаҕа ыытылынна. Манна, бастатан туран, «Экология” национальнай бырайыак боппуруостарын көрдүлэр.
edersaas.ru
Бу национальнай бырайыак чэрчитинэн нэһилиэнньэ, ордук Бүлүү умнаһын олохтоохторун ыраас уунан хааччыйыы, кинилэр доруобуйаларын туругун чинчийии, кытаанах хомунаалынай бөҕү харайыы саҥа ситимигэр көһүү, айылҕа баайын хостуур хампаанньалар тулалыыр эйгэни харыстыыр тус сыаллаах бырагыраамалара олоххо хайдах киирэн иһэрин кэтээн көрүү киириэҕэ. Итиэннэ өрөспүүбүлүкэҕэ сир баайын хостооччулар тулалыыр эйгэҕэ хоромньуну таһаарбаттарын ситиһии, айылҕа харыстабылын салаатын цифровизациялааһын үлэтэ ыытыллыаҕа.
«Экология» национальнай бырайыак өрөспүүбүлүкэҕэ олоххо киирэригэр 2021 сылга диэри 2,9 миллиард солкуобай федеральнай киинтэн көрүллүөҕэ. Ону таһынан, «Өлүөнэ очуостара» национальнай паарка федеральнай бүддьүөттэн үбүлэнэр тэрилтэ тэриллэрин туһунан бу муус устарга дьаһал таҕыста. Сахабыт сирин айылҕатын туругун научнай үлэһиттэр кэтээн көрүөхтэрэ уонна волонтердар айылҕаны харыстыырга үлэлэһиэхтэрэ», — диэн билиһиннэрдэ Айсен Николаев.
«Экология» национальнай бырайыак эрэгийиэннэргэ 2024 сылга диэри үлэлиэҕэ. Ол курдук Дьокуускайга, Мииринэйгэ, Ньурбаҕа, Бүлүүгэ куорат кыраныыссатынан ааһар көҥүлэ суох сыбаалкалары сабан, бөҕү тоҕор саҥа полигоннары тутуохтара. Усуйаанаҕа Кулардааҕы көмүһү хостуур хампаанньа доруобуйаҕа буортулаах тобоҕу мунньар сирин суох оҥоруохтара.
«Сыл ахсын өрөспүүбүлүкэҕэ ойуур баһаарыттан 270 мөлүйүөн солкуобай хоромньу тахсар, онон күөх тыа суугунун чөлүгэр түһэрэргэ тустаах үлэ барыа. Ойуур баһыырын умуруорарга быйыл 28 саҥа тиэхиньикэ кэлиэ”, — диэн эттэ Денис Белозеров, СӨ бырабыыталыстыбатын бэрэссэдээтэлин солбуйааччы.
Марианна Тыртыкова, «Саха сирэ», edersaas.ru