Өрөспүүбүлүкэ хаһаайыстыбаларыгар кыстык түмүктэнэн эрэр. Үгэс курдук, ыам ыйын бүтүүтэ – бэс ыйын саҥатыгар сүөһү көрөөччүлэр үрүҥ илгэни үрүлүтэр туһугар сүөһүлэрин сайылыктарга таһаараллар. Билигин бэлэмнэнэн, күрүө-хаһаа туталлар, тиийэр суолу оҥороллор.
Санатан эттэххэ, өрөспүүбүлүкэҕэ ыам ыйын 22 күнүгэр Сайылык күнүн бэлиэтииллэр. Бырааһынньык 2018 сыллаахха төрүт үгэстэри сайыннарар, тыа хаһаайыстыбатын эйгэтин үлэһиттэригэр болҕомто уурулларын туһугар Саха Өрөспүүбүлүкэтин Ил Дарханын Айсен Николаев Ыйааҕынан олохтоммута.
Быһа эфирин кэмигэр тыа хаһаайыстыбатын миниистирэ Александр Атласов быйыл сайылыктарга 41951 төбө сүөһүнү, ол иһигэр 20 тыһыынча ынаҕы таһаараары туралларын туһунан эттэ. Бу күннэргэ сайылыктарга 1648 үлэһит көһүөҕэ, кинилэртэн 756 ыанньыксыт, үүтү тутар 150 учуотчук, 237 тиэхиньик-буоһатааччы, 11 ньирэй көрөөччү, 393 бостуук.
“Сайылыкка көһүү мэлдьи уһун кыстык кэнниттэн күөххэ этэҥҥэ үктэнии үөрүүлээх күнэ. Сайылыкка тахсан үрүҥ илгэни үрүлүтэбит, тоҕо диэтэхэ, үүтү сыллааҕы кээмэйиттэн 60 бырыһыанын сайыҥҥы кэмҥэ ыыбыт”, — диэтэ Александр Атласов.
Миниистир иһитиннэрбитинэн, өрөспүүбүлүкэҕэ 355 сайылык аһыллыаҕа, итинтэн 339-һа үүтү ыаһыҥҥа уонна 16-та уотууга аналлаах. Киин уонна илин эҥэр улуустарга саамай элбэх сайылык баар. Ол курдук Уус Алдан улууһугар – 44, Аммаҕа — 39, Хаҥаласка — 29, Чурапчыга — 25, Мэҥэ Хаҥаласка — 23. Бүлүү умнаһынааҕы улуустарга саамай элбэх сайылык Сунтаар улууһугар –37. Хоту улуустар эмиэ сайылыкка көһөллөр, ол курдук, Дьааҥыга – 10 , Кэбээйигэ –9, Орто Халымаҕа –5 сайылыктаахтар.
Александр Атласов кыстык орто таһымнаахтык түмүктэнэн эрэрин бэлиэтээтэ. Ыам ыйын 12 күнүнээҕи туругунан өрөспүүбүлүкэ бары көрүҥнээх хаһаайыстыбаларыгар 213 828 сүөһү баар, ол иһигэр ынаҕын ахсаана — 78 069. Бүгүҥҥү күҥҥэ 39977 ынах төрөөтө. Уопсайа 189491 сыспай сиэллээх бары хаһаайыстыбаларга иитиллэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан