Саха сиригэр 350-тан тахса оҕо коронавируһу утары быһыыны ылла диэн СӨ Доруобуйа харыстабылыгар министиэристибэтин пресс-сулууспата иһитиннэрэр.
«Быһыыны ылыы босхо ыытыллар. Билиҥҥи кэмҥэ 357 оҕо быһыыны ылла» , — диэн иһитиннэриигэ суруллубут.
12-17 саастаах оҕолорго быһыыны биэрэр киин Дьокуускай куоракка Петровскай уул. 10/1 аадырыһыгар баар. Киин бэнидиэнньиктэн бээтинсэҕэ диэри 09:00-16:00 чааска үлэлиир.
«Баҕалаахтар олорор сирдэринэн поликлиникаларын колл-киинигэр эрийэн суруттарыахтарын сөп. Оҕолору күнүнэн, бириэмэтинэн көрөн быһыыны ыларга ыҥырыахтара», — диэн пресс-сулууспа иһитиннэрэр. Быһыыны ыларга полис, СНИЛС, төрөөбүтүн туоһулуур сибидиэтэлистибэ эбэтэр пааспар илдьэ тиийэр ирдэнэр. 12-15 саастаах оҕолор төрөппүттэрин кытта, оттон 15-17 саастаахтар бэйэлэрэ кэлиэхтэрин сөп.
РФ сиригэр-уотугар оҕолорго «Гам-КОВИД-ВакМ» (Спутник-М) быһыыны туруораллар. Бу улахан дьоҥҥо бэриллэр Спутник-V быһыы биэс төгүл чэпчэтиллибит барыйаана буолар.