Саха Өрөспүүбүлүкэтигэр Ийэ күнүн көрсө бырабыыталыстыба бэрэссэдээтэлин э.т. Андрей Тарасенко Ийэ пааматынньыгар сибэкки дьөрбөтүн уурда.
Саха сиригэр Ийэ күнүн 1993 сылтан алтынньы бастакы өрөбүлүгэр бэлиэтиибит.
«Түгэнинэн туһанан, өрөспүүбүлүкэбитигэр олорор ийэлэри кэлэн иһэр бырааһынньыгынан эҕэрдэлиибин. Ийэлэрбитигэр өссө биирдэ тапталга билинэр күннээхпититтэн биһиги олус үөрэбит. Оҕону улаатыннарыы, иитии — бу эппиэтинэс уонна дьол», — диэн Андрей Тарасенко эттэ.
Премьер э.т. сэрии көлүөнэтин кэрэ аҥаардарыгар анаан: «Эһиги күүстээх санааҕыт, дьоруойдуу быһыыгыт эр дьону барыны бары кыайарга, дьиҥнээх эр киһи буоларга үөрэппитэ», — диэн бэлиэтээн эттэ.
Пааматынньыкка сибэкки дьөрбөтүн ууруу бырааһынньыктааҕы тэрээһиннэр саҕаламмыттарынан ааҕыллар. Быйыл бырааһынньык онлайн киэбинэн ыытыллыаҕа.
СӨ Үлэҕэ уонна социальнай сайдыыга миниистирэ Елена Волкова иһитиннэрбитинэн, бэлиэ күҥҥэ анаан онлайн-быыстапкалар, маастар-кылаастар, «төгүрүк» остуоллар, хаартысканан куонкурустар тэриллиэхтэрэ. Муниципальнай тэриллиилэр уонна куораттар икки ардыларынан «Саха сирэ Ийэ күнүнэн эҕэрдэлиир!» диэн флешмоб ыытыллыаҕа. Өссө ийэ туһунан ырыалары түмэр хомуурунньук оҥоһулла сылдьар. Манна баҕалаахтар бары кыттыһыахтарын сөп. Ол туһуттан министиэристибэ саайтыгар сиһилии информацияны ааҕыҥ.
СӨ Ил Дарханын уонна бырабыыталыстыбатын пресс-сулууспата.