Бүгүн үс чаастааҕы дааннайынан, өрөспүүбүлүкэ үрдүнэн 274,8 тыһыынчаттан тахса киһи куоластаата.
Ил Түмэн икки быыбардыыр уокуругар эбии депутаттары талыы буолар. Ол курдук Халыма-Индигир уонна Дьокуускай куорат Университет быыбардыыр уокуругар куоластааһын ыытылла турар. Ону сэргэ Булуҥҥа, Эдьигээҥҥэ улуус баһылыктара, 37 нэһилиэккэ баһылыктар, 4 улуус сэбиэтин, 13 нэһилиэк депутаттара быыбарданаллар.
Быыбар киин хамыыһыйатын сэкирэтээрэ Эльвира Мярикянова иһитиннэрбитинэн, Саха сирин улахан куораттарыгар быыбарга кыттыы ааспыт быыбардары кытта тэҥ көрдөрүүлээх иһэр.
— Холобур, Нерюнгрига быыбардааччылар ахсааннарыттан 34,5% кэлэн куоластаатылар, Мирнэйгэ — 33,87%, Ленскэйгэ — 39,09%, Алдаҥҥа — 37,07%, Дьокуускайга — 36,93% тэҥнэһэр, — диэн бэлиэтиир Эльвира Трофимовна.
Аграфена КУЗЬМИНА, edersaas.ru