Орто Халыма улууһун Березовка сэлиэнньэтэ 2000-с сыллартан хаста даҕаны ууга барбыта, онон сибээстээн өрөспүүбүлүкэ бырабыыталыстыбата бу сэлиэнньэни уу ылбат сиригэр көһөрүү биэс сыллаах былаанын таҥмыта.
edersaas.ru
Ааспыт нэдиэлэҕэ Орто Халыма улууһугар 2018-2022 сылларга былааннаммыт көһөрүү чэрчитинэн тутуллубут биэс иккилии квартиралаах дьиэлэр ыал олохсуйарыгар бэлэм буолбуттарын туһунан биллэрбиттэрэ. Ол аата Березовка өссө 10 ыала бу күннэргэ саҥа дьиэҕэ киирэр кыахтанна.
Былаан сыл аайы олоххо киирэн иһэр. 2018 сылга саҥа дизельнэй электростанция, дизельнэй уматыгы харайар ыскылаат, 400 миэтэрэ уот линиялара тутуллубуттара. 2019 сылга саҥа Березовка олорор дьиэлэрин тутуу саҕаламмыта.
Судаарыстыба аатыттан ГКУ «СӨ судаарыстыбыннай сакаасчытын сулууспата» ХЭТ «Бэксэк» уонна ХЭТ «Эркин Плюс» тутуу тэрилтэлэрин кытта 15 иккилии квартиралаах дьиэлэри тутууга дуогабар түһэрсибитэ. Тутуу сезонун бүтүүтүгэр киин ититэр ситимҥэ холбоммут саҥалыы тутуллубут дьиэлэрдээх бастакы уулуссалар баар буолбуттар. 2019 сыл атырдьах ыйын бүтүүтэ саҥа Березовка ититии систиэмэтигэр холбоммута. Ону тэҥэ урукку Березовкаттан саҥа Березовкаҕа тиийэр суолу тутуу саҕаламмыта, кураанах сиргэ турбут сэлиэнньэ уулуссаларын болотунатын кутуу үлэтэ тэтимнээхтик барбыта.
2019 сыл бүтүүтүгэр оҥоһуллубут үлэлэр түмүктэринэн 30 ыал саҥа, куттала суох сиргэ дьиэлэммиттэрэ — ол аата 248 киһи олорор сэлиэнньэтин аҥара кэриэтэ саҥа дойдуларын булбуттара. 2021-2022 сылларга саҥа Березовкаҕа өссө 18 олорор дьиэ, 35 миэстэлээх оҕо уһуйаана уонна биир административнай дьиэ тутуллуоҕа.
СӨ Бырабыыталыстыбатын Бэрэссэдээтэлин бастакы солбуйааччытын эбээһинэһин толорор Кирилл Бычков бу туһунан маннык эттэ:
— Ирбэт тоҥҥо сытар туундара курдук уустук сиргэ үһүс сылын сабыс-саҥаттан дьон олорор сирэ тутулла турар. Бу тутуу олус уустук усулуобуйаҕа бара турар — тутуу матырайаалын ыраахтан тиэйэн аҕалыы, тутуу үлэтигэр ыарахан гидрогеологическай усулуобуйа, тымныы климат үлэһиттэргэ мэһэйдииллэр. Холобур, былырыын Орто Халыма улууһугар кыһыҥҥы суолунан 30 туонна ититэр эрэ тэриллэри тиэйбиппит. Орто Халымаҕа саҥа Березовканы тутуу, саарбаҕа суох, биһиги дьиэ тутааччыларбыт, суол-иис тардааччыларбыт, теплотехниктарбыт сатабылларын көрдөрөр, Арассыыйа Арктикатын баһылыыр-көһүлүүр уонна сайыннарар холобурдара буолуоҕа.
Егор Карпов, «Саха сирэ» хаһыат, edersaas.ru