Өрөспүүбүлүкэ сиригэр-уотугар буола турар ойуур баһаардарын туругун туһунан СӨ премьерэ Андрей Тарасенко кыттыылаах суһал ыстаап мунньаҕар дьүүллэстилэр.
Ойуур баһаардарын умулларыыга ылыныллыбыт миэрэлэри Бүлүү, Үөһээ Бүлүү, Кэбээйи, Ньурба, Сунтаар, Томпо, Уус- Маайа уонна Хаҥалас оройуоннарын бэрэстэбиитэллэрэ отчуоттаатылар.
Түөлбэ иһигэр барыта 10 км иһинэн 8 ойуур баһаарын умуруорууга суһал дьаһаллар ылыллаллар. Ити Ньурба оройуонун Маар уонна Араҥастаах, Сунтаар оройуонугар Түбэй, Үөһээ Бүлүү оройуонугар Далыр уонна Булгунньахтаах, Миирнэй оройуонугар Маар Арыы бөһүөлэктэриттэн тэйиччи сытар учаастактар.
СӨ Экологиятын миниистирэ Сахамин Афанасьев иһитиннэрбитинэн, өрөспүүбүлүкэ уон улууһугар барыта 22 ойуур баһаарын умуруора сылдьаллар: Ньурбаҕа — 3, Сунтаарга — 4, Кэбээйигэ — 4, Бүлүүгэ — 1, Үөһээ Бүлүүгэ- 2, Ленскэйгэ- 1, Уус Маайаҕа-1, Хаҥаласка — 1, Томпоҕо — 2, Нерюнгригэ — 3, ол иһиттэн алта баһаар көрдүгэнэ бохсуллубут.
СӨ Ыччат министиэристибэтэ иһитиннэрбитинэн, баһаары утары устудьуоннар этэрээттэрэ тэрилиннэ, билигин биригээдэлэри тэрийэр үлэ бара турар. Бырабыыталыстыба бэрэссэдээтэлэ бастакы солбуйааччы Дмитрий Садовниковка ыччат министиэристибэтин кытары үлэлэһэн, устудьуоннар этэрээттэрин байыастарын оройуоннарга тарҕатарга сорудахтанна.
Саха сиригэр ойуур баһаарын умуруорууга барыта 1 610 киһи үлэлиир: Авиалесоохрана, Якутлесресурс, ЫБММ, ойуур харыстабылын үлэһиттэрэ уонна олохтоох дьон. Бэҕэһээ Владивостоктан уонна Хабаровскайтан кэлбит парашютист-десантниктар сөптөөх ыйыыны-кэрдиини ылан, Үөһээ Бүлүү уонна Ньурба оройуоннарын сиригэр-уотугар үлэлии сылдьаллар. Ону тэҥэ «Полярнай авиалиния» авиахампаанньа сөмөлүөтэ баһаары умуруорууга аналлаах эбии тэриллэри уонна маллары аҕалла, Бүлүү бөлөх улуустарынан кэтээн көрөөччү летчиктар кэллилэр.
Баһаары умулларыыга 22 салгын суудуналара үлэлии- хамсыы сылдьаллар, олор өрөспүүбүлүкэ 18 оройуонун уонна Дьокуускай куорат ойуурдарын харабыллыыллар. Ону таһынан, баһаарга үлэлии сылдьар дьоҥҥо астарын-үөллэрин, наадалаах тэриллэрин аҕалаллар уонна ойуур баһаарын умулларааччы бөлөхтөрү көһөрөргө үлэлэһэллэр.