Саха сиригэр бастакы оҕоҕо төлөбүргэ анаан федеральнай бүддьүөттэн 214 мөл. 389,7 тыһ. солк. үп көрүлүннэ.
Бу туһунан премьер-министр Дмитрий Медведев 3008-р №-дээх уурааҕа таҕыста. Федеральнай бүддьүөттэн барыта 21,4 млрд. солк. тыырылынна. Арассыыйаҕа Оҕолор интэриэстэрин көмүскүүр национальнай стратегия оҥоһуллубута. Сэтинньи ыйга Владимир Путин бу стратегияны олоххо киллэрэр туһунан сүбэлэһэр мунньахха, демографияны тупсарарга миэрэлэри ылары сорудахтаабыта. Онон ахсынньыга федеральнай сокуон ылыллыбыта.
2018 сыл тохсунньу 1 күнүттэн саҕалаан төрөөбүт (иитиэх ылыллыбыт) бастакы оҕоҕо тиийинэн олоруу алын кээмэйин саҕа төлөбүр олохтонон, кырачаан балтараа сааһын туолуор диэри ый аайы төлөнөр.
2017 сыл 2-с кыбаарталыгар тиийинэн олоруу алын кээмэйэ оҕоҕо – бастакы зонаҕа 20 050 солк., иккис зонаҕа – 16637 солк. этэ. Онон эдэр ыаллар бу сууманы оҕо балтараатын туолуор диэри ый аайы ылар кыахтаннылар.
Бу аадырыстаммыт көмө дьиэ кэргэн төһө дохуоттааҕыттан көрөн бэриллэр. Биһиги барыллаан ааҕыыбытынан, өрөспүүбүлүкэҕэ 4 тыһыынча кэриҥэ ыал ылар кыахтаах.
Бу көмөнү саҥа оҕоломмут ыал барыта ылар диэн буолбатах. Дьиэ кэргэн хас биирдии чилиэнигэр тиксэринэн, үлэһит киһиэхэ тиийинэн олоруу алын кээмэйэ балтарааҕа төгүллэммитин саҕа дохуоттаах буоллахтарына. Бу кээмэйи эмиэ ааспыт сыл 2-с кыбаарталыгар олохтоммутунан ааҕаллар. Дьиэ кэргэн хас биирдии чилиэнигэр тиксэр дохуот бу сууматтан кыра буоллаҕына, төлөбүрү ылар кыахтаахтар.
Босуобуйа федеральнай бүддьүөттэн үбүлэнэр, сыллата 340 тыһ. тахса киһи ылара сабаҕаланар. Сыл аайы кыралаан (үстүү мөһөөх) эбиллиэхтээх. Онон сабаҕалааһын быһыытынан, 2018 сылга 21 миллиард солк., 2019 сылга 55 миллиард солк., 2020 сылга 68 миллиард солк. ороскуоттаныахтаах.
Ангелина Васильева, “Саха сирэ” хаһыат, edersaas.ru
Уруһуй: интэриниэттэн.