Саха сиригэр сүөһү-сылгы кыстыгар анаан оттооһун үлэтэ хайдах тэриллибитин манна ааҕыҥ:
Бүгүҥҥү туругунан өрөспүүбүлүкэҕэ мобильнай биригээдэлэр 18 770 туонна оту (былаан – 54 956 т) бэлэмнээтилэр. Бу туһунан Саха сирин Бырабыыталыстыбатын Бэрэссэдээтэлин солбуйааччы Михаил Никифоров балаҕан ыйын 6 күнүгэр сүөһү аһылыгын бэлэмнээһин хампаанньатыгар анаан ыыппыт брифинигэр иһитиннэрдэ.
Бу дьоҕус оттуур биригээдэлэри тэрийиигэ 80 мөл. солк. кэриҥэ үп-харчы көрүллүбүтэ. Дьокуускай куорат уонна Ленскэй оройуонуттан ураты муниципальнай оройуоннарга үбү тиэрдибиттэрэ.
Өрөспүүбүлүкэҕэ балаҕан ыйын 5 күнүнээҕи туругунан, 443 880 туонна былаантан 329 909 туонна от (74%) кэбиһилиннэ. Ону тэҥэ 17384 туонна сиилэһи (былаан – 30 184 т) уктулар.
Михаил Никифоров бэлиэтээбитинэн, төһө да уустук усулуобуйа үөскээбитин үрдүнэн, үгүс муниципальнай оройуоннарга бэҕэһээҥҥи туругунан 24 тыһ. киһи ходуһаҕа оттуу сылдьар. 8170 звено тэриллибит. Итинтэн толору механизациялаах звенота – 1864, ситэтэ суох механизациялааҕа –4172, көлө-илии звенота –186, илиинэн оттооччу – 1768.
Бу кэмҥэ былаантан хаалыы маннык улуустарга бэлиэтэнэр: Кэбээйи (33%), Дьааҥы (39 %), Бүлүү (52%), Өлүөхүмэ (60%), Горнай (66%).
Ол да буолллар, ааспыт икки-үс хонукка күн-дьыл уустук усулуобуйата үөскээбит Дьааҥы улууһугар кыралаан былааҥҥа эбиллии бэлиэтэнэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан