Бүгүн-сарсын, от ыйын 6 уонна 7 күннэригэр, нуучча тылыгар Биир кэлим эксээмэн ыытыллар. Бүгүн бу эксээмэни 199 пуунунан 4994 киһи туттарда диэн Үөрэх министиэристибэтин пресс-сулууспата иһитиннэрэр.
Сарсын бу эксээмэни 13 пуунунан 713 киһи туттарара күүтүллэр. Онон, барыта 5707 киһи эксээмэнниир.
СӨ Үөрэххэ уонна наукаҕа миниистирэ Михаил Сивцев Дьокуускай куорат 24-с №-дээх оскуолатыгар сырытта. Манна 12 аудиториянан 94 киһи эксээмэн туттарда.
«Дьокуускайга 19 пуун үлэлээтэ. Сайаапкаласпыт 1854 киһиттэн 1799-а эксээмэннээтэ. Биһиги сорукпут диэн БКЭ туттарааччыларга тустаах усулуобуйаны тэрийии буолар. Билиҥҥитэ биир даҕаны кэһии тахсыбата«, — диэн миниистир Михаил Сивцев бэлиэтиир.
БКЭ туттарааччыга хас биирдиилэригэр мааска уонна бэрчээкки түҥэттилэр. Коронавирус дьаҥа бэлиэтэммэтэх сиригэр эксээмэннээчи харыстанар малын кэтимиэн сөп, ол эрээри 1,5 миэтэрэ тэйиччи олоруу, илиини антисептигынан соттуу ирдэнэр.
Нуучча тылыгар БКЭ түмүгэ от ыйын 20 күнүгэр диэри биллиэхтээх.
edersaas.ru