Саха сиригэр 1800 тахса дьиэни гааһынан сылытыыга көһөрүөхтэрэ

Ааптар: 
Бөлөххө киир:

Тустаах бырагыраама көмөтүнэн төһө кэмчилээһин тахсыай? Дьиэлээх киһиэхэ барыстаах дуо?

Саха сиригэр 1800 тахса дьиэни индивидуальнай гааһынан сылытыыга көһөрүү нэһилиэнньэ олоҕун тупсарыаҕа, сылааһынан хааччыйыы иһин төлөбүрү кэмчилиэҕэ, өрөспүүбүлүкэҕэ гаастааһын таһымын үрдэтиэҕэ уонна хомунаалынай комплекс тэрилтэлэригэр субсидияҕа судаарыстыба биэрэр бүддьүөтүн кэмчилиэҕэ.

“Кииннэммит ититииттэн гааһынан кэтэх сылытыыга көһөрүү бырагырааматын чэрчитинэн гаас киирбит нэһилиэнньэлээх пууннарыгар 2024 сылга диэри 1898 кэтэх дьиэ Чурапчы, Бүлүү уонна Горнай оройуоннарын пилотнай 7 нэһилиэнньэлээх пуунугар көһөрүллэрэ күүтүллэр”, — диэтэ Саха сирин бырамыысыланнаска уонна геологияҕа миниистирэ Максим Терещенко.

Бырагырааманы оҥорууну тустаах министиэристибэ Экэниэмикэ, ОДьКХ министиэристибэлэрин, Сыана судаарыстыбаннай кэмитиэтин, муниципалитеттары кытта сүрүннээбитэ. Өрөспүүбүлүкэ баһылыга Айсен Николаев бу бырагыраама идиэйэтин биһирээбитэ. Онон 2020 сыл от ыйыгар Саха сирин бырабыыталыстыбата гааһынан кэтэх сылытыыга көһүү бырагырааматын бигэргэппитэ. Ити сыл сэтинньи ыйыгар Толоон сэлиэнньэтигэр күүтүүлээх гаастара киирбитэ.

“Гаас дьиэбитигэр кэллэ, үөрүү бөҕөбүт”, — диэн дьаһалта баһылыга Константин Лебедев ахтар. Бэрдьигэстээх сэлиэнньэтин олохтоохторо эмиэ маннык үөрүүнү билбиттэрэ.

Уопсайа бырагыраама көмөтүнэн Чурапчы, Горнай уонна Бүлүү оройуоннарын сэттэ нэһилиэнньэлээх пууннарын гаастыахтара:

Чурапчы сэл., Чурапчы оройуона;

Дириҥ сэл., Чурапчы оройуона;

Бэрдьигэстээх сэл., Горнай оройуона;

Толоон сэл., Чурапчы оройуона;

Туора Күөл, Чурапчы оройуона;

Үрүҥ Күөл сэл., Чурапчы оройуона;

Эбэ сэл., Бүлүү оройуона.

Бырагыраама субсидиялааһыны мэктиэлиир.

“Гаас турбатын учаастакка тартахтарына дьиэлээх киһи ороскуоту көрсөрүн билэбит: гаас турбатын тутуу, иһинээҕи гаас турбаларын тардыы, хочуолу туруоруу уо.д.а. Ол иһин бырагыраама нэһилиэнньэҕэ барыстаах буолуохтаах”, — диэтэ миниистир.

Исписэлиистэр этэллэринэн, бырагыраама олоххо киирдэҕинэ олохтоохтор хомунаалынай өҥөлөргө сылга хас да тыһыынча кэмчилээһини ылыахтара, оттон бүддьүөтү сыллааҕы кэмчилээһин 1 млрд солкуобайы 2024 сыл кэннэ куоһарыаҕа.

Билигин Саха сирин бырабыыталыстыбата тустаах министиэристибэлэри кытта кииннэммит гааһынан хааччыйыы оннугар убатыллыбыт гааһы туһаныы боппуруоһун көрөр. Маныаха Хачыкаат сэлиэнньэтэ пилотнай бырайыагынан буолуоҕа.

Хачыкаат пилотнай сэлиэнньэтигэр быйыл бырайыагын оҥоруохтара, салгыы убатыллыбыт гааһы тутар, харайар пууну уонна регазификацияны тутуохтара уонна хочуолунайы саҥаттан тупсарыахтара.

Өрөспүүбүлүкэҕэ 8 оройуоҥҥа сылааһынан хааччыйар 48 эбийиэк убатыллыбыт гааска көһүөн сөп. Ханнык эбийиэктэр киирэллэрин чопчулуохтара. Хочуолунайдары көһөрүү ночоото суох буолуохтаах.

Бэлэмнээтэ Женни Стрюкова

Хаартыска: саайтан

+1
0
+1
0
+1
0
+1
0
+1
0
+1
0
+1
0