Тыа сиригэр ыраах улуустарга көттөххө, киһи аэропуортара эргэтин, сэбиэскэй кэм саҕаттан туох да тутуу барбатаҕын, авиация быраҕыллыбытын, умнулла быһыытыйбытын бэлиэтии көрөҕүн. Манна икки-үс күҥҥэ биир сөмөлүөт кэллэҕинэ, улахан бырааһынньык. Дьон бары сырсан кэлэннэр оҕолорун-урууларын, доҕотторун көрсөллөр, кэһии ыыпыттарын ылаллар, туох табаар кэлбитин билэллэр. edersaas.ru
Биир үөрүүлээх сонун быһыытынан, Росавиацияҕа Арассыыйа 33, ол иһигэр өрөспүүбүлүкэ 15 аэропуордун саҥардыы бырайыага бигэргэннэ. Ол туһунан биэдэмистибэ салайааччытын солбуйааччы Олег Клим Федерация Сүбэтигэр иһитиннэрдэ.
Онон Эдьигээн, Чокуурдаах, Ньурба, Өлүөхүмэ, Сангаар, Орто Халыма, Депутатскай, Черскэй, Хаандыга, Белая Гора, Үөһээ Бүлүү, Бүлүү, Саккырыыр, Тиксии, Нерюнгри аэропуортара аныгы кэм ирдэбилигэр сөп түбэһэр курдук оҥоһуллуохтара.
«Тырааныспар ситимин сайдыыта» бырагыраама чэрчитинэн 11 аэродром саҥардыллыыта үбүлэниэ, онтон 57-тэ эбии үбүлээһин көстөр түгэнигэр быһаарыллыа диэн чуолкайдаата Олег Клим.
Аэропуортары саҥардыы үлэтэ икки түһүмэххэ арахсан оҥоһуллуо: экономическай сайдыы уонна куттала суох буолууну хааччыйыы хайысхатынан.
Марианна ТЫРТЫКОВА, «Саха сирэ» хаһыат, edersaas.ru