СӨ Бырабыыталыстыбатын бэрэссэдээтэлин солбуйааччы Михаил Никифоров муус устар 11 күнүнээҕи брифинигэр кулун тутар 10 күнүттэн Аллараа Бэстээхтээҕи тимир суол ыстаансыйатыгар бурдуктаах, саахардаах, куруппалаах, уотурбалаах 600-тэн тахса богуон сүөкэниллибитин туһунан иһиттиннэрбитэ. Онон бородууктанан, табаарынан хааччыллыы сөбүгэр бара турар.
Вице-премьер Михаил Никифоров бэлиэтээбитинэн, Ил Дархан Айсен Николаев эрэгийиэҥҥэ бородууктанан хааччыллыыга куттал суоһаабатыгар аналлаах мунньахха сайыҥҥы уу суолунан таһаҕаһы тиэрдиигэ бэлэмнэниини саҕалыырга сорудахтаабыт. Билиҥҥи туругунан, өрөспүүбүлүкэҕэ бородууксуйанан уонна табаарынан хааччыллыы саппааһа 98 күҥҥэ, оттон кууһунан атыылааһыҥҥа 130 күҥҥэ тиийэр.
СӨ Сыана бэлиитикэтигэр судаарыстыбаннай кэмитиэтэ иһитиннэрэринэн, ааспыт түөрт күҥҥэ 12 бородууксуйаҕа (сибиинньэ этэ, чэй, мас арыыта, саахар уо.да.а.) сыана 6 % үрдээбит. Оттон 6 көрүҥҥэ сыана 2% түспүт (ынах этэ, ынах арыыта, моркуоп, сүбүөкүлэ, оҕурсуу, оҕо үүтэ). Ону тэҥэ, 9 көрүҥҥэ сыана оннунан хаалбыт (үүт, сымыыт, туус, бурдук, килиэп…). СӨ Сыана бэлиитикэтигэр судаарыстыбаннай кэмитиэтэ СӨ Борокуратууратын кытта күн аайы сыананы аһары үрдэтиини кытаанах хонтуруолга тутар.
Бүгүн, муус устар 13 күнүгэр, Саха сиригэр тимир суолунан бородуукталаах, табаардаах 1234 богуон айаннаан иһэриттэн 619-һа Аллараа Бэстээххэ кэлиэҕэ. Ону тэҥэ, билигин Аллараа Бэстээххэ 357 богуон кэлэн турар. Бородууктаны, табаары сүөкээһиҥҥэ 9 кыраан уонна 7 биригээдэ үлэлиир.
Александр Тарасов, «Саха сирэ»