Бүгүн, бэс ыйын 1 күнүгэр, 11:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев:
— Өрөспүүбүлүкэбитигэр коронавирус балаһыанньата уустугуран турар. Дьаҥ туруоҕуттан 2042 киһи ыарыйда, оттон бүтэһик сууккаҕа — 112 киһи. Ол иһигэр, Дьокуускайга 95 киһи ыарыыга сутулунна. Ааспыт түөрт күҥҥэ 100-100-тэн тахсалыы киһи ыарыйда. Оттон ыарыы тарҕамматын туһуттан ылыныллыбыт миэрэлэр түмүктэрэ бу күннэргэ көстүө дии саныыбын.
Ааспыт өрөбүллэргэ Дьокуускайга дьиэҕэ хааччахтанан олоруу индексэтэ Арассыыйаҕа, Уһук Илиҥҥэ инники сылдьар. Ол иһин, олохтоохтор хааччахтааһыны тутуһалларыгар, өйүүллэригэр, эппиэтинэһи өйдүүллэригэр махтанабын. Уопсай сыранан эрэ куоракка уонна оройуоннарга турбут эпидемияны кыайыахпыт.
Нам оройуонугар балаһыанньа уустугурда. Суһал ыстаап сөптөөх үлэлэри ыыттаҕына, ыарыы салгыы тарҕаныа суоҕа дии саныыбын. Билигин эрдэ хантаактаспыт дьону кытта үлэлэһэбит, бу ыам ыйын 9 күнүттэн саҕаламмыт кэһиллиилэри кытта сибээстээх.
Оттон Алдаҥҥа эбии 8 киһи ыарыйда. Бу — баахтабай үлэһиттэр. Олохтоохторго куттал суоһаабат, үлэ бара турар.
Дьокуускайга уонна Мииринэйгэ барыта аҕыс киһи ыарахан туруктаах сытар. Быраастар тугу кыайалларынан үлэлииллэр. Ол курдук, 89 саастаах ыарыһах этэҥҥэ буолан, ИВЛ-аппарааттан араарылынна, бэйэтэ тыынар буолла. Онон, өрөспүүбүлүкэ миэдиктэригэр махтанабын.
edersaas.ru