Үлэ, социальнай сайдыы министиэристибэтэ сыл аайы ЗАГС уорганнара биэрэр дааннайдарынан, төгүрүк тыһыынча сыыппаранан төрөөбүт оҕолору чиэстиир. Ол курдук, быйыл өрөспүүбүлүкэҕэ 11-с тыһыынча оҕонон Сунтаар улууһун Бордоҥ нэһилиэгэр Ноевтар дьиэ кэргэттэригэр Нарыйаана диэн кыысчаан бэһис оҕонон төрөөтө.
Биэс оҕолоох да буоллаллар, Ноевтар – эдэр ыал. Кинилэри Бордоҥҥо Дьиэ кэргэн күнүгэр сөп түбэһиннэрэн, үөрүүлээх быһыыга-майгыга эҕэрдэлээтилэр. Бу күн өссө Дьоруой Ийэлэри чиэстээтилэр.
Елизавета Осиповнаҕа уонна Вячеслав Александровичка СӨ Үлэҕэ, социальнай сайдыыга министиэристибэтин анал сэртипикээтин уонна үрүҥ көмүс харысхал бэлиэтин туттардылар. Сунтаардааҕы социальнай көмүскэл управлениетын салайааччы Михаил Тимофеев, улуустааҕы ЗАГС отделын салайааччы Анна Григорьева кэлэн, кинилэри эҕэрдэлээтилэр. Ону тэҥэ, нэһилиэк дьаһалтата, олохтоохторо, Ноевтар аймахтара, доҕотторо, кэлиэгэлэрэ истиҥ эҕэрдэлэрин, бэлэхтэрин анаатылар.
Саха сиригэр төрөөһүн өлүүттэн элбэх, Уһук Илин эрэгийиэнигэр төрөөһүн көрдөрүүтүнэн бастаан иһэр. 2019 сыллаахха 12 817 оҕо, 2020 сылга 13 097 оҕо күн сирин көрбүтэ. Бу төрөөбүт оҕолор 40 бырыһыаннара элбэх оҕолоох дьиэ кэргэттэргэ күн сирин көрөллөр.
Ангелина Васильева, «Саха сирэ» хаһыат, edersaas.ru
Хаартыскаҕа: sakhagov.ru