Саха сиригэр “1000 тиэргэн” бырагырааманан тутуу үлэтэ ыам ыйыгар саҕаланыаҕа
Саха сиригэр бу сыл ыам ыйыгар “Уһук Илиҥҥэ 1000 тиэргэн” бырагырааманан тутуу үлэлэрэ саҕаланыахтара.
Билигин 37 муниципальнай тэриллиигэ 124 тиэргэн уонна дьоҕус пааркалар эскизтэрин уонна бырайыактарын түмүктүүр сөбүлэһиннэрии ыытыллар. Бэлэмнэнии хас биирдии түһүмэҕэр нэһилиэнньэлээх пууннар кытталлар.
Саха сирин Ил Дархана Айсен Николаев санаатынан, уопсастыбаннай сирдэри тупсаҕай оҥоруу уонна куораттарга, сэлиэнньэлэргэ тупсаҕай эйгэни тэрийии дьон олоҕор-дьаһаҕар быһаччы сабыдыаллыыр уонна Саха сирин олохтоохторо маны дьүүллэһиигэ быһаччы кытталлар.
Бырагырааманы олоххо киллэриигэ Саха сиригэр 1556,46 мөл солкуобай ыытыллыаҕа, итинтэн федеральнай бүддьүөттэн – 979,65 мөл солк. уонна муниципальнай уонна өрөспүүбүлүкэ бүддьүөтүттэн – 576,81 мөл. солк.
Үс сыл устата Саха сирэ “Дьиэ-уот уонна куорат эйгэтэ” национальнай бырайыак “Куорат тупсаҕай эйгэтин үөскэтии” бырайыагы олоххо киллэрэр. 2021 сылга Саха сиригэр федеральнай бырайыагынан 30 тиэргэн уонна 11 уопсастыбаннай миэстэ тупсарылынна.
Бүтүн Арассыыйатааҕы куонкурус түмүгүнэн 2021 сылга Ньурба куоракка кытылы тупсаҕай оҥоруу уонна Покровскайга сатыы киһи бульвара бастыҥ бырайыактар ахсааннарыгар киирбиттэрэ. Балары олоххо киллэриигэ быйыл 100 мөл. солкуобай федеральнай үбүлээһин көрүлүннэ.
Томмокко чэбдигирдэр паарканы, Алдаҥҥа Орто Салаа үрэх куораттааҕы кытылын, Мииринэйгэ Заречнай түөлбэ Иирэлээх үрэххэ сынньатар сирин бырайыактарын олоххо киллэрии саҕаланна. Ону тэҥэ Нерюнгригэ Г.И.Чиряев аатынан сынньалаҥ паарката, Горнай Бэрдьигэстээҕэр Маатта үрэҕи туоратар муостаҕа ыытыллаллар.
Бырайыак чэрчитинэн 2022 сылга 31 эбийиэги тупсарыахтара. Ону сэргэ Дьокуускай, Алдан, Нерюнгри, Томмот уонна тыа сирин икки поселениетын маастар-былааннара торумнанан бигэргэниэхтэрэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: тустаах саайтан
Бэлэмнээтэ Женни Стрюкова