Алтынньы 4-7 күннэригэр Москваҕа, Бүтүн Россиятааҕы тыа хаһаайыстыбатын быыстапката «Көмүс күһүн – 2017» буолла.
Быыстапка арыллыытыгар Россия Федерациятын Бырабыыталыстыбатын Бэрэссэдээтэлэ Дмитрий Медведев, тыа хаһаайыстыбатын миниистирэ Александр Ткачев уо.д.а. сырыттылар. Быыстапкаҕа дойду 70 регионуттан 1400 тэрилтэ итиэннэ 15 тас дойду бэрэстэбиитэллэрэ кыттан, оҥорон таһаарар бородууксуйаларын, туһанар технологияларын, салааны сайыннарыыга инвестиционнай бырайыактарын көрдөрдүлэр.
Саха сириттэн Бырабыыталыстыба Бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев салайааччылаах дьоһун дэлэгээссийэ тиийэн кытынна. Алтынньы 5 күнүгэр “Тыа сирин кэлимник сайыннарыы” бырагыраамма чэрчитинэн тэриллибит төгүрүк остуолга ааспыт 2016 сыл түмүгүнэн Саха өрөспүүбүлүкэтэ биэс мэтээли ылла! Ол курдук, регионнар икки ардыларынааҕы күрэхтэһиигэ кыайбыт Тыа хаһаайыстыбатын уонна ас-үөл бэлиитикэтин министиэристибэтэ (Бырабыыталыстыба Бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев), оройуоннар икки ардыларынааҕы күрэхтэһиигэ тэҥнээҕин булбатах «Чурапчы улууһа» муниципальнай тэриллии (баһылык Андрей Ноговицын), бааһынай хаһаайыстыбаларга бастыҥынан ааттаммыт Чурапчы улууһун Одьулуун нэһилиэгин “Комплекс” бааһынай хаһаайыстыба (салайааччы Михаил Михайлов) кыһыл көмүс мэтээли туттулар! Муниципальнай тэриллиилэр икки ардыларынааҕы күрэхтэһиигэ ситиһиилээхтик кыттан, Хаҥалас улууһун Өктөм нэһилиэгэ (баһылык Большаков) үрүҥ көмүс мэтээлинэн, Амма улууһун Соморсун нэһилиэгэ (баһылык Алексей Кононов) боруонса мэтээлинэн бэлиэтэннилэр! Санатан эттэххэ, Бүтүн Россиятааҕы тыа хаһаайыстыбатын быыстапката уон тохсус төгүлүн ыытыллар, оттон маннык үрдүк билиниигэ Саха сирэ бастакытын ситистэ. Бу Саха өрөспүүбүлүкэтин олоҕо-дьаһаҕа туруктааҕын, Ил Дархан Егор Борисов ыытар бэлиитикэтэ сөптөөҕүн, Россия салалтата ону сыаналыырын көрдөрөр.
Раиса Сибирякова, “Саха сирэ” хаһыат, edersaas.ru .
