Маны аах Уопсастыба

Саха сирэ «Зодчество 2021» бэстибээлгэ 50-тан тахса үлэнэн кытынна

Москваҕа «Зодчество 2021» бэстибээлгэ архитектордар үлэлэрэ көрдөрүүгэ туруорулунна. Манна 50-тан тахса үлэнэн кытыннылар.

Норуоттар икки ардыларынааҕы XXIX төгүлүн ыытыллар «Зодчество 2021»  бэстибээл Москваҕа Гостиный двор быыстапкалыыр комплекска алтынньы 1-3 күннэригэр буолла. Быйылгы түһүлгэ тиэмэтэ — «Истина». Куратор Алексей Комов этии киллэриитинэн уонна архитектураҕа, куораты тутууга аныгы хабааны көрдүүр, булар соруктаах.

Саха сирин дэлэгээссийэтэ култуура, доруобуйа харыстабылын, үөрэх уонна тырааныспар эйгэтигэр бырайыактар биһирэмнэрин оҥордо. Олор ортолоругар эпос уонна ускуустуба Арктикатааҕы киинэ, наука аччыгый академиятын үөрэнэр куорпуһа, Хаҥалас оройуонугар Өктөмҥө оскуола-уһуйаан билиһиннэриигэ бааллар. Маны сэргэ, куораты тутууга аныгы хабааннаах, ураты көстүүлээх — үс Арктика сэлиэнньэтин уонна Дьокуускайга «Звезднай» түөлбэ маастар-былааннара, туристическай эбийиэктэр көрдөрүлүннүлэр. Экспозицияҕа биир биллэр-көстөр эбийиэгинэн өрөспүүбүлүкэ дьоно саамай долгуйа, эрэнэ күүтэр бырайыактара — Өлүөнэ күргэтэ, ону сэргэ Дьокуускай куорат былаана — Ленин проспегын уонна болуоссатын саҥардан оҥоруу маастар-былаана көрдөрүллүүлэрэ буолла.
Саха сирин хамаанданан улахан, сыралаах үлэтин түмүгүнэн бэстибээл «Кыһыл көмүс» бэлиэтэ буолла.  Саха сирэ Москва, Приморье, Нижегородскай, Тюмень уобаластарын бастыҥ хамаандаларын ортолоругар ааттанары ситистэ. Маны сэргэ, архитектура уонна архитектордар тустарынан бэчээттэммит кинигэлэргэ көрүү-куонкуруска Саха сирин архитектордарын холбоһугун чилиэннэрэ Эрнст Алексеев уонна Кузьма Лыткин үлэлэрэ бастыҥынан ааттаннылар, бэстибээл дипломунан наҕараадаланнылар.
«Маннык улахан тэрээһиннэргэ бэлэмнэнии дьоһун үлэни ирдиир. Ордук чуолаан Үүнэр көлүөнэ тус сыаллаах пуондатын компетенцияҕа киинин уонна СӨ Ил Дархан архитектураҕа управлениетын хамаандалара СӨ архитектордарын холбоһугун кытары бииргэ баараҕай үлэни оҥордулар диэн бэлиэтиэхпин баҕарабын. Бары бырайыактары ылыы, үс блогунан араарыы, экспозицияны оҥорооччулары, бэстибээл куратордарын кытары тиһиктээх үлэ, экспозицияны туруорууну талыы, бэстибээл кураторын Алексей Комовы кытары үлэлэһии — манна барытыгар бириэмэ наада этэ. Хамаанда үлэҕэ чопчутук, чуолкайдык ылсан, ситиһиигэ кынаттаабыттарыгар махтанабын. Экспозицияҕа архитектордар, Саха сирин проектировщиктарын 50-тан тахса үлэлэрэ туруорулунна. Бөдөҥ инфраструктурнай уонна инвестиционнай эбийиэктэри сэргэ, уустук үлэлээх уонна олус интэриэһинэй бырайыактар, ол иһигэр устудьуоннар кыттыылаах үлэлэр эмиэ көрдөрүүгэ ылыллыбыттара. Далааһыннаах тэрээһин дьүүллүүр сүбэтэ Саха сиригэр улахан үлэ ыытылларын сыаналаата. Биллэн турар, СӨ Ил Дарханыгар Айсен Николаевка биһигини куруук өйүүрүгэр махтанабыт. Кини өйүүр буолан, биһиги бүгүн тапталлаах Сахабыт сирин сайыннарар, өрөспүүбүлүкэбитигэр анаан айар, оҥорор кыахтаахпыт», — диэтэ СӨ Ил Дархан архитектураҕа уонна куораты тутууга управлениетын салайар Ирина Алексеева.

«Быыстапканы көрөөччүлэр уонна эспиэрдэр үксүлэрэ өрөспүүбүлүкэ туруорбут экспозициятын дириҥ толкуйдаахтык оҥоһуллубутун бэлиэтээтилэр. Биһиги хамаандабыт туруоруллубут сыалын-соругун ситистэ, эрэгийиэн архитектураҕа уонна куораты тутууга бары кыаҕын көрдөрдө дии саныыбын», — диэн «LETO» куорат эйгэтин тупсарыы боппуруостарыгар компетенция киинин салайар Ирина Маркина эттэ.

Өйөбүлү «Якутия» конгресс-киин, «Uraan» айар бөлөх, архитектор Айталина Брызгалова оҥордулар. Ону сэргэ, хамаанда улахан махталын РФ Бэрэсидьиэнигэр СӨ бастайааннай бэрэстэбиитэлистибэтигэр тэрийэр боппуруостары быһаарыыга көмөтүн, киэргэллэринэн ураты болҕомтону тардыбыт «Киэргэ» ювелирнай дьиэҕэ, «Саха» НКИХ Москватааҕы филиалыгар тиэрдэр.

«LETO» куорат эйгэтин тупсарыы боппуруостарыгар компетенция киинин пресс-сулууспата

0
0