Саха сирэ сыаналааһынынан уонна дойду Бырабыыталыстыбата кэтээн көрүүтүнэн, Саха Өрөспүүбүлүкэтэ Арассыыйаҕа ыраахтан олорон (дистанционно) үөрэтии соругун сөпкө, толору хааччыйан, биэс эрэгийиэн кэккэтигэр киирбит. Ити туһунан СӨ Бырабыыталыстыбатын Бэрэссэдээтэлин солбуйааччы Сергей Местников “Талбан” биэрии кэмигэр иһитиннэрдэ.
Бэрэссэдээтэли солбуйааччы ыйарынан, Саха сирэ Москва, Санкт Петербург, Татарстан курдук бөдөҥ эрэгийиэннэр кэннилэриттэн тилэх баттаһа иһэр эбит.
Дистанционнай үөрэхтээһиҥҥэ бары даҕаны соһуччу киирбиппит. СӨ Үөрэҕин уонна наукатын министиэристибэтэ төһө элбэх оҕо төлөпүөнүнэн, көмпүүтэринэн үөрэнэрин, анал тэриллээҕин-суоҕун барытын анаалыстаабыт. Хомойуох, иһин оскуола үөрэнээччилэрин уонна устудьуоннар ортолоругар анал көмпүүтэрдээх оҕо аҕыйаҕа биллибит. Онон “Биир ньыгыл Арассыыйа” баартыйа нөҥүө “Дьиэттэн олорон үөрэнэргэ көмөлөс” диэн аахсыйа ыытыллыбыта. Ону таһынан, министиэристибэ үлэһиттэрэ бэйэлэрэ эмиэ ити аахсыйа иитинэн кыаммат ыал оҕолорун хааччыйыыга кыттыбыттар.
“Быйыл күһүҥҥү кэтээн көрүү быһаарбытынан, сайыҥҥы кэмҥэ элбэх төрөппүт оҕотугар ноутбук ылбыт. Ноутбуга суох оҕо үөрэнэрэ уустук диэн төрөппүт өйдөөбүт, усулуобуйа тэрийэргэ дьулуһар” – диэн миниистири бастакы солбуйааччы Ирина Любимова этэр. Ону тэҥэ, улуустарга интэриниэти ыалынан тардыыга сыаната ыараханын, маныаха үлэ барыан наадатын бэлиэтиир.
Күн бүгүн оскуола 50 % олоҕурбут (очно), 4 % ыраахтан олорон (дистанционно), 46 % буккаас (очнай-заочнай) көрүҥүнэн үөрэнэ олороллорун иһитиннэрдэ.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).