2017 сыллаахха Абу-Дабига ыытыллыбыт аан дойдутааҕы чөмпүйэнээт үөрүүлээх сабыллыытын тэрээһинигэр, WorldSkills былааҕын Арассыыйа дэлэгэссийэтигэр туттарбыттара. Итинтэн ыла WorldSkills International өйөбүлүнэн барар, соҕотох бырайыак – WorldSkills былааҕын эстафетата саҕаламмыта.
Аахсыйа саҕаланыаҕыттан WorldSkills былааҕа космическай станцияҕа, чөмпүйэнээттэр ыытыллыбыт 20 дойдуларыгар сырытта. Атырдьах ыйыгар Соҕуруу-Сахалинскайга Арассыыйатааҕы түһүмэх саҕаламмыта. Сыл аҥаарын иһигэр дойду 14 куоратын таарыйда.
«Эдэр профессионаллар» (WorldSkillsRussia) эрэгийиэннээҕи аһаҕас VII чөмпүйэнээт аһыллыытыгар, Саха сирэ 15-с эрэгийиэнинэн WorldSkills былааҕын эстафетатын тутта.
Былааҕы СӨ бырабыыталыстыбатын бэрэссэдээтэлин солбуйааччы Ольга Балабкинаҕа WorldSkills Казань-2019 култуураҕа бырагырааматын департаменын салайааччыта уонна тэрийэр кэмитиэтин чилиэнэ Роман Османов туттарда.
Ольга Балабкина, Саха сирэ WorldSkills хамсааһыҥҥа 2013 сылтан кыттарын санатта. “Биһиги сүрүн сорукпут – иитии уонна күөн күрэстэһэр кыахтаах ыччаты иитэн таһаарыы. Ити соругу өрөспүүбүлүкэ толорор. Күн бүгүн биһиги оҕолорбут Арассыыйаҕа тарбахха баттаналлар”, — диэн бэлиэтээтэ. Сарсын былааҕы аан дойдуга биллэр, ытыктанар Өлүөнэ остуолбаларыгар таһаарыахтарын туһунан иһитиннэрдэ.
Чөмпүйэнээт эрэгийиэннээҕи түһүмэҕэр өрөспүүбүлүкэ араас муннуктарыттан тыһыынчаттан тахса киһи кыттыаҕа. “Эдэр профессионаллар” 55 компетенциянан, “Юниордар” 54 компетенциянан итиэннэ 50 саастарыттан үөһэлэргэ “Муударайдар сатабыллара” үстүү компетенциянан барыаҕа.
WorldSkills хамсааһын уһулуччу талааннары уонна кэнэҕэс “сулустары” көрдүүр сыалтан Саха сирин тоҕус улууһугар 29 күрэхтэһии былаһааккатыгар үлэ саҕаланна.
СӨ Ил Дарханын уонна Бырабыыталыстыбатын пресс-сулууспата.