Саха сирэ уонна Татарстан тыа хаһаайыстыбатын сайдыытыгар бииргэ үлэлэһиэхтэрэ, ол иһигэр түргэнник ситэр салааларга. Бу туһунан Саха сирин Бырабыыталыстыбатын Бэрэссэдээтэлэ Андрей Тарасенко Татарстан Өрөспүүбүлүкэтин Бэрэсидьиэнэ Рустам Миннихановы кытта көрсүһүүтүн түмүгүнэн иһитиннэрдэ.
“Биһиги түргэнник ситэр салаалары сайыннарыыга улахан болҕомтобутун уурабыт. Бу хайысха олохтоох оҥорон таһаарыыга уонна тыа сирин олохтоохторун дохуоттаах оҥорууга дьоһун суолталаах. Татарстан тыа хаһаайыстыбатын сайыннарыыга сүҥкэн уопуттаах, чуолаан, сүөһү иитиитин салаатын сайыннарыыга кинилэр үтүө уопуттарын туһаныахпыт. Татарстантан тыа хаһаайыстыбатын көтөрүн, түргэнник улаатар көрүҥнэрин аҕалыахпыт”, — диэтэ Андрей Тарасенко.
Саха сирэ Татарстан сиригэр-уотугар үлэлиир КАМАЗ массыынаны дойдуга оҥорон таһаарааччыны кытта бииргэ үлэлэһиини кэҥэтиэҕэ. Бу таһаҕас тиэйэр массыыналар тиэйэр-таһар үлэҕэ уонна анал тиэхиньикэ быһыытынан Саха сиригэр киэҥник туһаныллаллар.
Рустам Минниханов Саха сирин Бырабыыталыстыбатыгар эрэгийиэннэр икки ардыларыгар бииргэ үлэлээһин боппуруостарыгар уонна былырыын Казань куоракка ыытыллыбыт Саха сирин күннэрин тэрийии иһин махтанна. 2022 сыл бэс ыйыгар Дьокуускайга Татарстан Өрөспүүбүлүкэтин күннэрэ буолуохтара. Өрүттэр Татарстан САССР 100 сылыгар анаммыт тэрээһиннэригэр кыттыытын эмиэ дьүүллэстилэр.
Санаттахха, Саха сирин уонна Татарстан икки ардыларыгар бастакы дуогабар 1996 сыллаахха илии баттаныллыбыта, 2021 сыл бэс ыйыгар эрэгийиэннэр экэниэмикэ, култуура, социальнай уонна атын эйгэлэргэ бииргэ үлэлииргэ саҥа сөбүлэһии түһэрсибиттэрэ. Ону тэҥэ 2023 сылга диэри маны олоххо киллэрии былаанын торумнаабыттара. Бу докумуоҥҥа өрөспүүбүлүкэлэр баһылыктара Айсен Николаев уонна Рустам Минниханов илии баттаабыттара.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Татарстан Өрөспүүбүлүкэтин Бэрэсидьиэнин пресс-сулууспатын хаартыската
Бэлэмнээтэ Женни Стрюкова