Саха сирэ уонна Татарстан экономикаҕа, култуураҕа, туризмҥа саҥаны киллэриигэ үлэлэһиэхтэрэ
Татарстаҥҥа Саха сирин күннэрин чэрчитинэн Казань куоракка экономика бары эйгэтигэр саҥаны киллэрии, туризмҥа уонна муниципальнай тэриллиилэр сайдыыларыгар форум буолан ааста. Тэрээһиҥҥэ муниципальнай тэриллиилэр бииргэ үлэлэһиигэ дуогабар түһэристилэр.
РФ бэрэсидьиэнигэр Саха сирин бастайааннай бэрэстэбиитэлэ, СӨ бырабыыталыстыбатын бэрэссэдээтэлин бастакы солбуйааччы Андрей Федотов Татарстаҥҥа Саха сирин күннэрэ былырыын ыытыллыахтаахтарын, онно туһуламмыт үлэ регионнарга иккиэннэригэр биир сыл устата барбытын туһунан бэлиэтээтэ.
– Историяттан ыллахха, биһиги Татарстан Өрөспүүбүлүкэтин кытары дириҥ силистээхпит. Ону сэргэ национальнай өрөспүүбүлүкэлэр буоларбыт быһыытынан Арассыыйаҕа ураты миэстэни ылабыт. Регионнар уопут атастаһыылара, бэйэ-бэйэлэрин кытары хардарыта үлэлэһиилэрэ дойдубут сайдыытыгар улахан оруоллаах. Бу көрсүһүүлэр чэрчилэринэн кэнэҕэскитин бары эйгэлэринэнүлэ барыаҕа, – диэн эттэ.
Татарстан Өрөспүүбүлүкэтин премьер-миниистирин солбуйааччы, промышленность уонна атыы-эргиэн миниистирэ Альберт Каримов Арассыыйаҕа саамай улахан сирдээх-уоттаах, дириҥ историялаах, туспа култууралаах, үгэстээх регион буоларын этэн туран, национальнай өрөспүүбүлүкэлэр сайдыыларыгар бу маннык көрсүһүүлэр төһүү күүс буолалларын бэлиэтээтэ. “Биһиги экономика араас эйгэтигэр бэйэ-бэйэбититтэн үөрэнэрбит, уопут атастаһарбыт үгүс. Ону сэргэ култуураҕа, спорка, туризмҥа, үөрэххэ барытыгар бииргэ үлэлэһэргэ бэлэммит”, – диэн иһитиннэрдэ.
Саха сирин экономическэй бырайыактарын экономика миниистирэ Майя Данилова билиһиннэрдэ. Култуура эйгэтигэр бырайыактар тустарынан миниистир Юрий Куприянов кэпсээтэ.
Форум түмүгэр Дьокуускай куорат уонна Мииринэй оройуона Татарстан муниципальнай тэриллиилэрин кытары бииргэ үлэлэһиигэ дуогабар түһэристилэр.
Саха народнай суруйааччыта Николай Лугинов, саха режиссера, СӨ искусствотын үтүөлээх деятеля Никита Аржаков национальнай өрөспүүбүлүкэлэр сайдыыларыгар ураты кылааттарын иһин “Татарстан АССР 100 сыла” үбүлүөйүнэй бэлиэнэн наҕараадаланнылар.
Аграфена КУЗЬМИНА
Хаартыска: Василий Кононов түһэриитэ