Саха сирэ уонна Татарстан бииргэ үлэлиэхтээх бырайыактарын туһунан кэпсэттилэр
Ил Дархан Айсен Николаев Татарстан Өрөспүүбүлүкэтин бэрэсидьиэнэ Рустам Миннихановы кытары көрсөн, эрэгийиэннэр икки ардыларынааҕы бырайыактар тустарынан кэпсэттэ. Бу күннэргэ Дьокуускайга Татарстан Өрөспүүбүлүкэтин күннэрэ буола тураллар.
Санатан эттэххэ, былырыын Казань куоракка Татарстан Өрөспүүбүлүкэтэ тэриллибитэ 100 сылыгар Саха сирин күннэрэ ыытыллыбыттара. Онно икки эрэгийиэннэр экэниэмикэ үгүс хайысхатыгар бииргэ үлэлэһиигэ дуогабар баттаспыттара. Татарстан бэрэсидьиэнэ Рустам Минниханов айти-технология быыстапкатын көрө сылдьан: “Саха сиригэр бу эйгэҕэ үгүс үлэ барбыт, мин санаабар, кэнэҕэскитин бу эйгэҕэ бииргэ үлэлэһиэхпитин сөп”, – диэн бэлиэтээбитэ.
– Былырыын биһиги өрөспүүбүлүкэбит 100 сылын бэлиэтээбиппит. Онно Саха Өрөспүүбүлүкэтиттэн улахан дэлэгээссийэ кэлэн, Саха сирин күннэрин ыыппыта. Оттон быйыл биһиги Саха сирин биир үйэлээх үбүлүөйүгэр эһигини эҕэрдэлии уонна бэйэбит үлэбитин, бырайыактарбытын кэпсии кэллибит. Мин санаабар, норуот үйэлээх үгэһин сайыннара, киэҥ эйгэҕэ таһаара турара олус үчүгэй. Ити үтүө холобуру Саха сирэ тута сылдьарыттан тус бэйэм үөрэбин. Биһиги уруулуу эрэ норуот буолбатахпыт, үгүс эйгэҕэ бииргэ үлэлэһэрбит биһигини биир ситимниир. Саха сирэ билигин үгүс эйгэҕэ инники күөҥҥэ иһэр. Кэнэҕэскитин сүбэбитин холбоон бииргэ үлэлээтэхпитинэ, федерация киинигэр да бэйэбит интэриэспитин туруулаһарбытыгар төһүү буолуоҕа, – диэн иһитиннэрдэ.
Ил Дархан Айсен Николаев көрсүһүү кэмигэр былырыыҥҥы Казань куораттааҕы көрсүһүүлэр Саха сиригэр үтүө түмүктэри аҕалбыттарын бэлиэтиир.
– Былырыын Казаннааҕы көрсүһүүлэр, кэпсэтиилэр түмүктэринэн, үгүс эйгэҕэ, ол иһигэр бырамыысыланнаска, тыа хаһаайыстыбатыгар, саҥаны киллэрии бырайыактарыгар, саҥа, сонун хайысхалар арылыннылар. Икки эрэгийиэн бырабыыталыстыбатын таһынан, тэрилтэлэр, муниципальнай тэриллиилэр бииргэ үлэлэһэн эрэллэр. Айти-технология сайдыытыгар биһиги улахан былааннардаахпыт. Өскөтүн биһигин хампаанньаларбыт аан дойдуга тахсыбыт буоллахтарына, Татарстан дойдубут иһигэр бу чааһыгар инники күөҥҥэ иһэр, – диэн этэр Айсен Сергеевич.
Аграфена КУЗЬМИНА