Бэлиитикэ

Саха сирэ уонна Татарстан бииргэ үлэлэһиилэрэ саҥа таһымҥа таҕыста

“Татарстан Өрөспүүбүүлүкэтин кытары бииргэ үлэлэһэргэ Саха сирэ 1994 сыллаахха дуогабар түһэрсибитэ. Онон Казань куоракка буолбут Саха сирин күннэригэр бэрэсидьиэн Рустам Миннихановы кытары дуогабар түһэрсибиппит биһиги өрөспүүбүлүкэлэрбит сайдыыларыгар саҥа кэрдиис кэминэн буолуоҕа”, – диэн  Ил Дархан Айсен Николаев “Саха” НКИХ биэриитигэр бэс ыйын түмүгүн таһаарарыгар иһитиннэрдэ.

Бэс ыйын саҥата Татарстаҥҥа Саха сирин күннэрэ ыытыллыбыттара. Манна култуура үлэһиттэрин таһынан урбаанньыттар, дьоҕус, орто урбаан бэрэстэбиитэллэрэ кыттыыны ылбыттара. Ону сэргэ бырабыыталыстыба, улуус баһылыктара сибээскэ, култуураҕа, экэниэмикэҕэ, о.д.а. хайысхаларга бииргэ үлэлэһэргэ дуогабарга илии баттаһан кэлбиттэрэ.

– Урукку өттүгэр бу маннык күннэр ыытыллалларыгар үксүн култуура эрэ өттүнэн муҥурданан хаалар буоллахпытына, Казаньҥа буолбут көрсүһүүлэргэ урбаан бэрэстэбиитэллэрэ, урбаанньыттар хото кытыннылар. Саха сирин күннэрин олохтоохтор олус сэҥээрэ көрдүлэр. Рустам Минниханов бэйэтинэн кэлэн үгүс көрсүһүүнү, быыстапканы көрбүтэ. Ону сэргэ Татарстан бырабыыталыстыбата, Казань куорат дьаһалтата, олохтоох салалта, дьокутааттар “төгүрүк остуолларбытыгар”, быыстапкаларбытыгар, араас көрсүһүүгэ кыттыбыттара. Ол түмүгэр үгүс хайысхаҕа дуогабар баттастыбыт. Ыгыллыбыт гааһы туһаныыттан саҕалаан айти-технологияларга тиийэ. Биир сүрүн дуогабарынан икки өрөспүүбүлүкэлэр салалталара иккиэн бииргэ үлэлииргэ дуогабар баттаспыппытын бэлиэтээн этиэм этэ. Санатар буоллахха, бу маннык дуогабар 1994 сыллаахха түһэрсиллибитэ. Ол кэнниттэн суох. Онон бу дуогабар биһиги өрөспүүбүлүкэлэрбит сайдыыларыгар саҥа кэрдиис кэминэн буолуоҕа. Эһиил Саха Өрөспүүбүлүкэтин 100 сылыгар Татарстан улахан дэлэгээссийэтин күүтэбит, – диэн Айсен Сергеевич бэлиэтиир.

Аграфена КУЗЬМИНА, «Саха сирэ» хаһыат, edersaas.ru

0
0