Саха сирэ уонна «Сколково» пуонда бииргэ үлэлииллэрин салгыахтара

Ааптар: 
Бөлөххө киир:

Саха сирэ уонна «Сколково» пуонда биир хайысханы тутуһан үлэлээбиттэрэ 9 сыл буолла.

Москваҕа ыытылла турар Nobel Vision. Open Innovations 2.0 пуорумҥа Ил Дархан  Айсен Николаев, «Сколково» пуонда салайааччыта Аркадий Дворковиһы, пуонда вице-бэрэсидьиэнэ Юрий Сапрыкины уонна  «Сколково» технопаарка генеральнай дириэктэрэ Ренат Батыровы кытта көрүстэ.

2012 сыллаахха саҕаламмыт бииргэ үлэлээһин үгүс үтүө түмүктэрдээх.

 «Сколково» пуонданы  кытта бииргэ үлэлэһиэхпититтэн ыла Саха сирин технопаарката инновационнай экэниэмикэ,  бастыҥ технологическай быһаарыылары олоххо киллэриигэ, өҥөнү оҥорууга инники күөҥҥэ таҕыста. 2019 сыллаахха «Якутия» технопаарка «Сколково» пуонда эригийиэннээҕи операторын статуһун ылбыта. Бу үлэ түмүгэр резиденнэр дойдуларыттан тэйбэккэ пуонда тэриллэригэр уонна лабораторияларыгар куйаар ситиминэн үлэлиир кыахтаммыттара, федеральнай чэпчэтиинэн туһанар, граннарга кыттар буолбуттара. Салгыы бу маннык бииргэ үлэлээһини араас хайысханан  тэнитиэхпит, — диэн бэлиэтээтэ Айсен Николаев.

Оттон «Сколково пуонда салайааччыта Аркадий Дворкович:

— 9 сыл устата Саха сирэ технопааркатын стартаптарын ахсаана элбэҕинэн уонна хаачыстыбалаах үлэлэринэн үс бастыҥ эригийиэн ахсааныгар сылдьар. Өрөспүүбүлүкэ резиденнэрэ өрүү олоххо туһаныллар бырайыактары толкуйдууллар уонна мэдиссиинэ, атын да социальнай хайысхаларынан олоххо киллэрэллэр. ХИФУ-ну кытта  бииргэ үлэлээһиммит эмиэ тахсыылаах. Өрөспүүбүлүкэ 100 сылыгар туһаайан 2022 сылга аны кэлэр 10 сылга бииргэ үлэлээһиҥҥэ сөбүлэҥ түһэрсиэхпит, — диэн санаатын үллэһиннэ.

Өрүттэр маны таһынан 2022 сылга Startup village норуоттар икки ардыларынааҕы кэмпириэнсийэ чэрчитинэн ыам ыйыгар Саха сирин күннэрин ыытыыны дьүүллэстилэр.

Үгэс быһыытынан биһиги 800 инвестор мустар сиригэр улахан былаһаакка аныыбыт. Бу сырыыга ол былаһааккаҕа Саха сирэ бэйэтэ туспа шатер туруоруоҕа. Онно ол мустубут инвестордар эһиги холобурга сылдьар хампаанньаларгыт  кыахтаах стартаптарын кытта бастакынан билсиэхтэрэ, — диэн «Сколково» технопаарка генеральнай дириэктэрэ Ренат Батыров бэлиэтээтэ. 

Саха АССР 100 сылыгар анаан Startup village тэрээһиҥҥэ сэргэ туруоруллара былааннанар.

Елена ПОТОЦКАЯ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0