Саха сирэ уонна Санкт-Петербург Арктиканы сайыннарыыга сөбүлэҥ түһэристилэр
Дьокуускай куоракка СӨ Бырабыыталыстыбатын бэрэссэдээтэлин э.т. Андрей Тарасенко уонна Санкт-Петербург вице-губернатора Эдуард Батанов көрсүһүүлэрин түмүгэр, Санкт-Петербург Арктика дьыалаларын кэмитиэтэ уонна СӨ Арктика, хотугу норуоттар сайдыыларын министиэристибэтэ сөбүлэҥ түһэристилэр. Ону таһынан, ХИФУ кэмитиэти кытары эмиэ эбии сөбүлэҥ түһэристэ.
edersaas.ru
Көрсүһүүгэ наука, бырамыысаланнас уонна экэниэмикэ эйгэлэригэр боппуруостары дьүүллэстилэр. Ону таһынан, суудуналары тутууга үөрүйэҕи атастаһыыга болҕомто уурулунна. Судаарыстыба өттүттэн Арктика сайдыытыгар болҕомто уурулларын, ол эрээри, Уһук Илин Арктикаҕа сайдыы тэтимэ бытаарбытын бэлиэтээтилэр. СӨ Бырабыыталыстыбатын Бэрэссэдээтэлин солбуйааччы э.т. Михаил Никифоров Саха сирин Арктическай зонатын сайыннарыыга эрэгийиэн эрэ ресурсата тиийбэтин бэлиэтээтэ.
Санкт-Петербург дэлэгээссийэтэ куорат бөдөҥ да, дьоҕус да биисинэскэ тэрилтэлэрэ Саха сирин кытары үлэлиэһиэхтэрин баҕаралларын биллэрбиттэрин иһитиннэрдэ.
Көрсүһүү түмүгүнэн, сөбүлэҥҥэ Арктика дьыалаларыгар Санкт-Петербурдааҕы кэмитиэт бэрэссэдээтэлэ Герман Широков уонна СӨ Арктика сайдыытын миниистирэ Владимир Черноградскай илии баттаатылар. Ону таһынан, эбии сөбүлэҥҥэ кэмитиэт бэрэссэдээтэлэ Герман Широков уонна ХИФУ наукаҕа проректора Юрий Данилов илии баттаатылар.
СИА саайтыттан.